AYAW i-parking ang imong sakyanan sa mga no-parking zone sa dakbyan sa Sugbo.
Kini ang panawagan ni Francisco Ouano, operations head sa Cebu City Transportation Office (CCTO), aron di ma-clamp ang imong service vehicle niining pagsugod sa nobenaryo alang sa kapistahan ni Snr. Sto. Niño.
Si Ouano nagkanayon nga modagsa ang libuan ka mga tawo sa Cebu City sa pagsugod sa nobenaryo hangtod mahuman ang Sinulog Festival,
Pun-an pa sa libuan ka mga tawo gikan sa lainlaing mga lungsod ug siyudad sa Sugbo lakip na ang out of town delegation nga mosalmot sa festival.
Base sa kasayuran gikan ni Konsehal Dave Tumulak, over-all chairman sa executive committee sa Sinulog Foundation Incorporated, labing dako nga delegasyon mao ang dakbayan sa Talisay nga moabot sa 1,600 ka mga tawo.
Tuyo sa CCTO nga di maalihan sa mga sakyanan ang sidewalk ug mismo ang karsada kay maoy hinungdan sa paghuot sa mga sakyanan.
Ang ubang lungsod ug siyudad lakip na ang out of town delegation magdala usab og ilang kaugalingong bus, dumptruck nga maoy sakyan sa ilang mga props.
Sa mosunod nga mga adlaw, magsugod na sila og pangabot.
Brand new clamps
Gipahibawo ni Ouano, nga niabot na sa ilang buhatan ang ilang gi-request nga 296 ka bag-ong clamps nga maoy ilang gamiton sa pag-kimpit sa ligid sa mga mag-illegal parking.
Sa kinatibuk-an moabot na sa 356 ka functional clamps ang magamit sa CCTO nga gihulagway ni Ouano nga dako na kaayo og ikatabang para sa pag-clamp sa mga sakyanan. PAC