KONSEHAL Arturo Bas mibalik na sa Konseho sa dakbayan sa Talisay ning semanaha human sa taas nga bakasyon.
Si Bas nga nahinabi sa mga tigbalita nagkanayon nga naputos siya sa tanang kasakit kasubo sa gidangatan sa iyang pamilya.
Sumala pa niya wa siya makaagwanta ug maboang siya kon naa siya iyang balay hinungdan nga nibakasyon sa gawas sa nasud.
“Kon anha ra ko sa akong balay, maboang ko magsigeg huna-huna tanang stress, physical mental, naa nako,”dugang ni Bas.
Niadtong Hulyo 2018, ang iyang apo nga si barangay konsehal Mark Stephen Bas, 23, gipusil patay sa riding in tandem dihang paingon kini sa tunghaan.
Sa Oktubre 2018, ang iyang anak nga si kanhi barangay kapitan Mark Ferdinand Bas gipusil patay usab.
Ang duha ka mga kaso wa pa masulbad ug wa pa say natumbok nga mga mamumuno.
Gipadayag niya nga grabe ka sakit ang nahiaguman sa iyang pamilya human sa duha ka mga hitabo.
Matod niya nga uyon na ang iyang doktor ug nga fit to work na siya hinungdan nga mibalik na siya sa Konseho.
Si Bise Mayor Allan Bucao nga nahinabi sa mga sakop sa tigbalita mipadayag sa iyang kalipay nga nabalik na si Bas.
Nitambong kini sa ilang regular nga session niadtong Martes sa buntag. GPL