MATAG adlaw, aduna’y 32 ka mga tawo nga matakdan sa HIV, base labing uwahi nga datus sa Department of Health (DOH).
Sa labing uwahi nga datus sa DOH niadtong Nobiyembre, niabot na sa 32 ka mga tawo ang matakdan o aduna’y human immunodeficiency virus (HIV), sinugdanan sa Acquired Immune Deficiency Syndrome (Aids) sa nasod matag adlaw.
Mao kini ang labing taas sa miaging tulo ka dekada.
Samtang ang Central Visayas, anaa sa ika-upat nga rehiyon sa nasod nga aduna’y labing daghang kaso sa HIV/AIDS diin tie niini ang Region 6 o Western Visayas.
Sukad 1984 hangtod Oktubre 2018, niabot na sa 5,438 ang kaso sa HIV/AIDS sa Central Visayas. Nag-una gihapon ang Cebu diin anaay natala nga 4,981 ka kaso.
Niadtong Enero hangtod Oktubre 2018, labing taas ang kaso sa mga lalake nga nakighilawas og lalake diin niabot kini sa 396 ka kaso; ikaduha ang lalake nga nakighilawas sa babaye sa 155 ka kaso; ug ang injecting drug use sa 148 ka kaso.
Niabot usab sa 34 ang patay sa maong sakit sa rehiyon sa susamang mga buwan niadtong 2018.
Nagpabilin usab nga taas ang age group nga 25-34 nga aduna’y labing daghang kaso sa nataptan sa maong sakit diin niadtong 2018 niabot kini sa 410, o 2,494 sukad 1984.
Ang HIV/AIDS kasamtangan nga way tambal nga makaayo, dili maayo ang pasyente nga anaa niini apan aduna’y tambal mga mamahimong mapugngan nga makatakod kini sa uban.
Matod ni Dr. Van Phillip Baton, program coordinator sa HIV/AIDS sa DOH 7 nga tungod kay dali nalang makighilawas karong panahona, hinungdan nga nisaka nga nag-unang rason kining pakighilawas sa babaye o lalake. HBL