TULO ka mga police official sa Police Regional Office 7 nga miuli nga walay pananghid atol sa One Time Big Time operation sa Negros Oriental gipangrelibohan ug gibalhin sa Regional Holding Admin Unit.
Ang maong mga pulis gipanghinganlan na ni Chief Supt. Debold Sinas.
Kini mao sila si Chief Insp. Jomar Anoba Medil, hepe sa Tourist Police Unit sa Cebu City Police Office, Insp. Mark Eric Papong ug Insp. Clifton Gairanod sa Regional Mobile Force Battalion.
Ang mag-agaw nga silang PO1 Melvin ug Thomas Cañete lakip usab sa gipang balhin sa RPHAU-7 samtang mag atubang silang kasong administratiba.
Gihimakak ni Sinas nga silang lima gipangdestino sa Guihulngan City police station sanglit pasakaan una silag kaso labot sa ilang pag-abandon sa ilang trabaho.
Gitug-an ni nga dako og tulobagon ang tulo ka mga police official sanglit pulos sila mga team leader ug ilang gipang biyaan ang ilang mga sakop bisan kon wa pa mahuman ang ilang trabaho.
Kasong abandoning post, conduct unbecoming of an officer ug absent without official leave(Awol) ang atubangon sa tulo ka mga pulis.
“We have to do this because it’s a massive operation and they just left the area. Yes, this is ground for dismissal that’s why amo ning giayo pag imbestigar because this is not good example to our people,” matod ni Sinas.
Si Medil gihulipan na ni Sr. Supt. Royina Garma isip hepe sa Tourist Police Unit bisan kon gianugnan siya sa performance niini.
Matod niya nga wala siyay problema sa trabaho ni Medil gani daghan kinig mga programa nga gipatuman nga iyang nauyonan.
“Wala naman siyang problema sa trabaho, siya nga yung author sa tourist of the day, pero nagkasala sya eh, malakang kasalanan yan kailangan nyang harapin” matod ni Sr. Supt. Royina Garma.
Si Medil, sa iyang bahin, nagkanayon nga iyang dawaton unsa man ang mando ni Sinas.
Ipadayon gihapon niya ang iyang pag tungha sa kursong abugasya ug nagtinguha nga iyang ma korehian ang iyang sayop nga nahimo.
Andam usab niyang atubangon ang silot nga ipahamtang kaniya sa Police Regional Office 7 ug ipasabot nganong niuli siya dinhi sa Sugbo atol sa nagpadayon nga One Time Big Time Operation sa Negros Oriental.