ANGGULO sa drugas ang usa sa gitan-aw nga motibo sa pagpusil patay kang San Fernando Municipal Councilor Reneboy Dacalos sa Barangay Poblacion pasado alas 4 sa hapon, Enero 10.
Matod ni Sr. Insp. Arvis Arvuis, hepe sa San Fernando police station, duha ka mga tawo ang ningpusil sa makadaghang higayon kang Dacalos.
Pulos kini niigo sa atubangang bahin sa lawas ni Dacalos.
Dugang ni Arvuis nga si Dacalos giingong naapil sa matrix sa linya ni Franz Sabalones, self confessed drug lord sa Central Visayas.
Gikan nga mikanaog sa iyang sakyanan si Dacalos.
Sa iyang pagsulod sa ilang tindahan, niabot ang riding in tandem.
Ang angkas nga nagtaptap sa nawong nikanaog ug niduol kang Dacalos dungan sa pagpusil sa makadaghang higayon.
Human sa pagpamusil, ningsibat ang mga killer agi sa luyo sa simbahan.
Wa na nila mahibaw-i kon asa na kini nipaingon.
Naa sa kustodiya sa San Fernando police station ang usa ka saksi, apan ang problema nagtaptap sa nawong ang gunman.
Sa pakisusi sa mga imbestigador sa asawa ni Dacalos, giingong wa kini makadawat og hulga sa kinabuhi.
Walo ka mga basiyo sa bala sa kalibre .45 nga pistola ang nakita ni Arvuis apan wa pa mahibaw-i kon pila ang naihap sa Scene of the Crime Operation (Soco).
“Among gipangutana iyang asawa kon naa ba ni siyay kaaway o naa ba siyay hulga tungod sa iyang negosyo or sa iyang pagka politiko, ingon sa asawa wala man daw. So, among tan-aw ani ang kusog-kusog ang drug kining iyang involvement kay Franz Sabalones kay apil man ni siya sa matrix,” matod ni Arvuis. Dugang taho ni GPL