SECTIONS
Thursday, July 18, 2019
SUPERBALITA CEBU

Limitahan ang deboto nga pasudlon sa bridge sa fluvial

CEBU. Mga deboto nga musaksi sa fluvial procession sugtan musaka sa bridge pero limitahan ang pasak-on. (SunStar file)

GIKLARO ni Senior Superintendent Limuel Obon, ang director sa Lapu- Lapu City Police Office, nga sukwahi sa unang plano, pasak-on gihapon ang mga deboto sa Mandaue-Mactan Bridge habig na sa dakbayan sa Lapu-Lapu nga buot mosaksi sa umaabot nga fluvial procession sa Fiesta Señor.

Apan gikatakdang kontrolahon kini sa kapulisan kun limitahan ang gidaghanon sa mga deboto nga mahimong makasaksi sa fluvial procession sa taytayan.

Gidili usab ang pagdala ug mga butang sama sa pabuto ug balloons alang niadtong adunay plano nga mosaksi sa fluvial procession sa taytayan aron kalikayan ang disgrasya.

Dugang ni Obon nga kung sa ilang bana-bana puno na ang taytayan hilabi na sa habig sa Lapu-Lapu, hayan dili na nila pasak-on ang uban pang deboto aron dili na kini ma-overcrowded hilabi na nga abli na sa mga motorsita ang taytayan atol sa fluvial procession.

Gikatakdang sirad-an lang sa mga motorista ang taytayan atol sa Traslacion nga manukad sa dakbayan sa Mandaue paingon sa dakbayan sa Lapu-Lapu sa Enero 19 sa kadlawon.

Sa milabayng katuigan, ang taytayan nahimo nang dapit hugopanan sa pipila ka mga deboto nga buot mosaki sa fluvial procession gumikan sa kabantang niini sa higayon nga moagi ang imahe sa balaang bata atol sa fluvial procession.

“Yes controlled. Kanang dili gyud mo-overflow, di ba naa man nay sidewalk ug mapuno na dili na namo (pasak-an) kay siyempre ang tendency man gud ana mokanaog sila (sa dalan). We always anticipate simbako naay matagak diha,” pagpasabot ni Obon.

Aron masiguro nga magpabilin ang kahapsay sa taytayan sa modugok nga mga deboto, dili na pabiyaan sa mga pulis ang dapit sa bisan pa man kun mahuman na ang Traslacion habig sa dakbayan sa Lapu-Lapu sa kadlawon sa Enero 19.

Samtang gibutyag ni Obon nga mokapin sa 200 ka mga pulis ang ilang ipakatap sa ipahigayong Traslacion habig sa Lapu-Lapu sa Enero 19 sa kadlawon nga maoy mobantay sa seguridad sa tibuok kalihukan.

Gawas niini, aduna usay mga force multiplier ug mga tanod sa matag barangay sa dakbayan nga moabag sa kapulisan.

Aduna usay ipakatap nga mga non-uniformed policemen sa pagbantay sa mga posibleng mopahimus sa higayon sama sa mga kawatan ug mangunguot.

Karong umaabot Enero 17, mopahigayon ug dry run ang kapulisan sa ila unyang ipatumang seguridad sa kalihukan aron mahan-ay na ang tanang security details sa kalihukan.

Atol sa Traslacion gikan sa dakbayan sa Mandaue paingon sa dakbayan sa Lapu-Lapu, magsilbing escort sa imahe sa balaang bata ang mga big bike sa Highway Patrol Group samtang sa kilid sa dalan ra ang mga deboto nga mag-atang.

“Along the route mao ang ato barricade unya mogamit ta ug lubid and then the policemen will be in front ng lubid kung baga naa sa sud gyud (sa rota), ang mga force multiplier maoy mobantay along the way then mogunit sa lubid then the policemen will be inside,” matod ni Obon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph