ANG pambato sa lungsod sa Medina nga si Chella Grace Falconer maoy mananaog sa Miss Kuyamis 2019 nga gipahigayon ang coronation night niadtong Huwebes sa gabii, Enero 10, sa Tagoloan Dome, lungsod sa Tagoloan, Misamis Oriental.
Mokabat sa 20 ka mga kandidata ang nagtigi sa maong titulo apan si Falconer lamang midaog.
Gawas sa titulo nga Miss Kuyamis 2019, naharbat sab ni Falconer ang mga major, minor, ug corporate awards sama sa Miss Kuyamis Cocktail Dress, Miss Le rouge and Spa, Best in Panel Interview, Best in Swimsuit, International Technical College, ug Best in Evening Gown.
First runner-up mao ang Miss Tagoloan nga si Maria Luz Delos Angeles;
2nd runner-up si Miss Talisayan Adel Ebarat; 3rd runner-up ang Miss Sugbongcogon nga mao si Cherry Rose Lomopog; ug 4th runner-up mao si Miss El Salvador Chris Antonette Teanio.
Nakadawat sab og award si Miss Gitagum Jeza Christyl Releveo isip Smart Communications Texters Choice Award ug Users Choice Award.
Nahimong Miss Globe Telco and Touch Mobile Texters Choice Award si Miss Villanueva nga mao si Justine Miles L. Abe.
Miss Photogenic si Miss Salay Nikki Daffodil Bullecer ug Miss Congeniality si Miss Lagonglong Mhedi Ali Mar Villaruz.
Gibutyag ni Falconer nga dili niya masabot iyang gibati nga kalipay.
Gipasabot niini nga dili tiaw ang iyang pagpaningkamot ug pagbahin sa iyang oras labina nagtungha siya isip usa ka accounting student sa Xavier University.
Andam sab niya nga ipresenta ang probinsya sa Misamis Oriental sa national pageant.
“I believe that the province has plans for me and I am ready for that,” matud niini.
Sa iyang bahin ni Misamis Oriental Governor Yevgeny Vincente Emano, nalipay siya sa resulta sa mga nidaog sa Miss Kuyamis.
Matud niini nga alang kaniya tanan 20 ka mga kandidata pulos mga mananaog niini kay dili tiaw ang magtungtong sa stage og morampa atubangan sa daghang tao.
“Congratulations to Miss Medina kang Mayor Dandan Chan for bagging the crown of Miss Kuyamis. The roads doesn’t end here, from here we still have Miss Millennial, we still have Miss Earth, and whatever available pageant there that will help us promote our province Misamis Oriental and she will be representing Misamis Oriental,” matud ni Emano.