ANG pagbundak sa ulan wala makapugong sa defending champion nga University of Santo Tomas (UST) Team A aron ablihan ang ilang pagdepensa sa titulo pinaagi sa pagbutlog sa Sikat Alab Football Club (FC) nga nakabase sa Davao City, 5-0, sa 4th Pinay in Action (PIA) Cup football tournament sa Tionko field, Barangay 76-A sa Matina, ning dakbayan Biyernes.
Si Hazel Lustan nangulo sa pagtala og iskor alang sa UST Team A, pinaagi sa pagpasulod og duha ka “goals” sa 13th ug 16th minutos samtang sila si Cecile Deite, Nathalie Absalon ug Joy Abo-Abo miiskor sab og tag-usa ka goal sa ikapito, 34th ug 36th, sa maong han-ay.
Si UST assistant coach Geraldine Cabrera, sa paghinabi uban sa SunStar Davao human sa duwa, nagkanayon, “First win namin, probably magtutuloy-tuloy na. Kailangang i-defend ang championship.”
Tulo lang ka senior nga magduduwa, matud niya, mipakita og gilas atol sa panagtigi batok sa Sikat Alab samtang ang uban mga bagohan.
Samtang mitala sab og kadaugan ang UST Team B pinaagi sa pagmakmak sa Dipolog Bad Bonitas, 14-1, sa laing panagsangka.
Nagpahigayon ang UST og training camp sa Davao City sukad pa niadtong milabay nga semana sa pagpangandam alang sa University Athletic Association of the Philippines (Uaap) kon diin gigunitan niini ang “runner-up honors” alang sa katapusang duha ka mga seasons.
Dugang pa niya, “Ang PIA Cup nakakatulong sa amin na umangat-angat, maging avenue para mag-improve ang mga bata like confidence nila through competition.”
Sa laing mga duwa, ang CR7 Food Truck mipalukapa sa Lianga Football Club sa Surigao del Sur, 5-3, pinaagi nila ni Michelle Javellana ug Agot Danton; samtang ang Sky Warriors FC sa Maco, Compostela Valley mipalukmay sa University of the Philippines (UP) Mindanao, 1-0, ug UP Women's Football Team Y sa Manila midugmok sa Baliwasan Redcorals United FC, 4-1.
Ang Ulticon Builders, Inc. maoy major sponsor sa liga nga gipasiugdahan sa PIA nga gitukod ni Taguig Representative Pia Cayetano ug gisuportahan sab sa SunStar Davao.
Ang pormal nga seremonya sa pagbukas mahitabo alas 10 sa buntag adlaw’ng Sabado.