DAKPAN sa checkpoint sa Task Force (TF) Davao sa Lasang ang usa ka lalaki human dunay gitago nga pinaugang dahon sa marijuana sud sa iyang brief, nga natupad na sa kinatawo, Huwebes sa buntag, Enero 10.
Giila ang dinakpan nga si Alyas Angelo, 26, ug taga Calumpang, General Santos City.
Nakuha gikan kaniya ang usa ka bundle sa dahon sa marijuana nga naay gibug-aton nga 10 gramos ug nagkantidad og P2,000.
Ang suspek gikan sa Tagum City ug sakay kini sa usa ka van padulong sa Davao.
Dihang gipalinya na ang mga pasahero aron hilingon ang mga bag ug kapkapan, ug dihang gikapkapan na, nahadlok ang suspek nga maoy hinungdan nga natahap ang TF-Davao personnel.
Nagduda na ang TF-Davao maong gi-hold ang suspek gumikan makita sa dagway niini nga nahadlok siya ug dunay gitagoan.
Sa paghiling ug gipakuha sa otoridad unsay gitagoan niini, hinayhinay nga mikuot ang suspek sud sa iyang brief kay natupad sa iyang kinatawo ang marijuana nga giayo niya'g tago.
Kasong pagsupak sa Republic Act 9165 kon Comprehensive Dangerous Drugs Act of 2002 ang ipasaka nga kaso batok sa suspek didto sa korte.