GIBUTYAG ni Chooks To Go president Ronald Mascariñas nga ang pagkamahinungdanon sa nasyunalismo maoy usa sa ilang katuyoan sa pagporma sa makasaysayong Chooks To Go SBP 3x3 Basketball Tournament nga sugdan karong adlawa sa Sisters of Mary (SMS) Boystown sa lungsod sa Minglanilla, Cebu.
Sa press conference kagahapon sa Bai Hotel sa dakbayan sa Mandaue, nagkanayon si Mascariñas nga sa iyang pagkahilambigit sa paugnat sa kusog sa milabayng duha ka mga tuig, iyang naobserbahan nga ang mga lider sa sports ug pamamatigayon hapit na mawad-i og gugma alang sa nasod.
“In the past two years that I’ve been into basketball, I observed that the love for the country is almost lost. Kaya kapag nag-form tayo ng national team, mahihirapan tayo dahil wala ng pagmamahal sa bayan ang ating sports leaders and business leaders,” matod ni Mascariñas.
Gitataw ni Mascariñas nga sa pagsuporta sa ilang kompanya sa paugnat sa kusog, gipalabi nila ang gugma sa nasod ug ulahi na ang kaugalingon nilang interes.
“This is the main reason why we are supporting sports... to help restore the love for the country,” pagtino ni Mascariñas.
Gipasabot ni Mascariñas nga ang laing nilang katuoyoan sa pagpahigayon sa Chooks To Go SBP 3x3 Basketball Tournament mao ang pag-agak og Pinoyng mga basketbolista nga makapakita og akyon sa Olympics.
Ang Pilipinas nagkinahanglang mopahigayon og daghang 3x3 tournament aron makasaka sa ranking sa FIBA nga maoy basihan aron makapadala og representante alang sa Olympics.
Matod ni Mascariñas nga mapasalamaton sila og dako sa Sisters of Mary School nga gidawat niini ang tahas isip host sa Chooks To Go SBP 3x3 Basketball Tournament, nga nagtinguha nga mapatik sa kasaysayan isip labing dakong 3x3 basketball youth tournament sa kalibutan kon hisgutan ang gidaghanon sa mga partisipante.
Karong adlawa ipahigayon ang boys under 18 division diin aduna kini 1,111 ka mga magduduwa nga gibahin sa 277 ka teams ang magsangka sa SMS Boys Town. Ang mga kombati dungan nga ipahigayon sa 25 ka basketball courts sa tunghaan.
Ugma, ipahigayon ang mga kombati sa girls 18-under division sa laing 25 ka basketball courts sa SMS Girlstown. Aduna kini 1,585 ka mga magduduwa nga gibahin sa 397 ka teams.
Ningtambong sab sa presscon kagahapon ang duha sa labing maayong amateur basketball players sa nasod nga sila si Kobe Paras ug Thirdy Ravena nga parehong naila kon hisgutan ang 3x3 basketball sa nasod.
“It’s truly an honor to be part of something historic,” asoy ni Paras, kinsa gikonsiderar nga maoy ambassador sa Philippine 3x3 basketball.
Ningtunga sab sa presscon sila si Samahang Basketbol ng Pilipinas (SBP) executve director Sonny Barrios ug Gilas Pilipinas team manager Butch Antonio. ESL