SECTIONS
Monday, March 25, 2019
SUPERBALITA CEBU

Balak: Mga anino sa kasub-anan kuyog sa pagsawop sa adlaw

Lamberto G. Ceballos

Cawayan, Dalaguete, Cebu

Dunay mga butang nga makapasubo nato

Inigtalad sa kahapunon, inigsawop sa adlaw.

Ang katahom sa bugnaw nga kahayag sa banagbanag

Sa kilumkilom hakpon na sa dagtom nga mga gaway

Sa naghuwat nga kangitngit aron bilangguon

Sa dulom nga lawak sa dughan sa langit.

Ang kasadya ug mga katawa, ang kahimuot

Ug kalipay sa adlawan pa mga tipik na lamang

Sa mitaliwang mga takna nga angkunon unya

Sa umaabot nga kagahapon.

Ang mga puting panganod inanay modis-og

Ug mahanaw sa hapsay nga aping sa langit,

Dayon mohabol ang kangitngit sa dulom

Nga kagabhion labi na kon ang buwan mangluod

Ug di mopatim-aw sa langit.

Dili na nato makita ang nagmaya nga kalibutan

Diha sa kahinanok sa atong katulugon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!