MOABOT ngadto sa 48 ka mga sakyanan ang gi-clamp ug usa ang giguroy gumikan sa pagparada sa mga no-parking zone sa unang 36 oras pagsugod sa nobenaryo para sa kapistahan ni Snr. Sto Niño.
Kini ang gibutyag ni Efren Navales, supervisor sa Cebu City Transportation Office (CCTO), human ilang natigom ang record gikan sa mga traffic patrol car ug multicab kinsa maoy gitahasan sa maong trabaho.
Si Navales nagkanayon nga adunay P1,500 nga multa ang clamping samtang P2,500 ang towing. Ang mga gi-clamp gipangbayran na sa mga tag-iya sa sakyanan.
Ang operations head sa CCTO nga si Francisco Ouano nagkanayon diyutay ra ang na-clamp palibot sa City Hall diin ang Plaza Sugbo nga garahian sa mga city official ug department head gihawanan sa mga sakyanan.
Gituyo kini sa CCTO sanglit kasikbit niini ang Basilica diin pagahimuon ang misa matag oras hangtod sa Enero 19 diin libuan ka mga tawo ang mosulod-gawas sa simbahan. PAC