NAGHIKOG pinaagi sa paglaslas sa iyang pulso ang 52 anyos nga inahan niadtong Huwebes mga alas 4:00 sa hapon sa Tablon ning siyudad sa Cagayan de Oro.

Nilanding sa Northern Mindanao Medical Center (NMMC) si Chonilla Limbaga, minyo, sa susamang dapit.

Usa sa personahe sa NMMC nga nahinabi sa Sun.Star Superbalita nibutyag nga posibleng problema sa pamilya ug pagmahay ngadto sa iyang bana ang gituohang hinungdan sa pagsuway og hunos sa kinabuhi sa usa ka inahan.

Nasayran nga nag-away ang biktima ug ang bana niini sa wala gikabutyag nga rason hinungdan nga kalit lang kining nasuko. Mikuha og kutsilyo dayon deretso nga gilaslas ang duha ka mga kamot hinungdan sa pagkasamad niini.

Giingong nataranta sab ang bana niini dihang nakitang nagkadugo ang kamot sa asawa hinungdan nga nagpatabang ug gidala ang biktima sa balay tambalanan.

Mitumaw ang taho nga selos ang giawayan sa magtiayon human namatikdang hubog nga miuli sa puloy-anan ang bana niini.

Daghan sab ang nagtuo nga posibleng problema sa pamilya ang hinungdan nga nisangpot sa panaglalis sa duha.

Apan ang biktima nidumili sa paghatag sa tinuod nga hinungdan sa giaawayan ug pagsuway og hikog niini.

Hinuon sa pagsulat ning balita gipasalamatang luwas na sa makuyawng kahimtang ang inahan apan padayon pang nagpaalim sa samad nga naangkon.