2 affidavits sa pagpatay kang Gisela Boniel wa motukma

WA MOTUKMA ang duha ka giluwatang affidavits sa saksi sa pagpatay ni kanhi Bien Unido Bohol Mayor Gisela Bendong-Boniel niadtong Hunyo 2017, sigun sa gihimong cross examination sa mga abogado sa depensa.

Samtang, nagabin-an ang korte sa pagpadayon sa maong proseso human mitugot si Judge Ferdinand Collantes, Regional Trial Court Branch 54, Lapu-Lapu Hall of Justice nga i-extend ang oras nga miabot sa pasado 6 sa gabii Biyernes, Enero 11, hinungdan nga milanat og kapin sa upat ka oras.

Si Atty. Renato Galeon, usa sa mga abogado sa depensa, mihulagway sa saksi nga si Riolito Boniel nga bakakon.

“It really appears that his (Riolito Boniel) two affidavits are pregnant with irreconcilable inconsistency,” tipik sa pamahayag ni Galeon.

Usa sa mga pamahayag sa saksi nga gisukit-sukit sa depensa kadtong na-unang pamahayag niini nga nakabantay nga milihok kadtong butang nga giputos og habol nga puti nga gisulod sa ilawom nga bahin sa pumpboat dayon gitabunan.

Gikuwestiyon ni Atty. Romero Boniel si Riolito nga dili katuohan ang pangankon niini nga nakabantay nga adunay naglihok.

Si Atty. Boniel maoy manlalaban sa principal suspect nga si kanhi Bohol Provincial Board member Niño Rey Boniel kinsa nag-atubang og kasong parricide gumikan sa kamatayon sa iyang misis nga si Gisela niadtong Hunyo 7, 2017.

Saysay ni Atty. Boniel nga gawas nga si Riolito maoy operator sa pumpboat atol sa ilang pagbiyahe paingon sa isla Olango, Lapu-Lapu ug base sa iyang nahimutangan, lisod nga makita niini ang kahimtang niadtong adunay giputos og habol tungod kay adunay gitabon.

Ang saksi nga diha sa witness stand mipasabot nga wa man tuod niya makita nga adunay naglihok apan siya nakasiguro nga buhi kini sa dihang adunay nagpunay og kagulkol o saba nga iyang namatikdan.

Napakgang sa makadiyot ang cross examination sa dihang gibati og pagka-insulto si Atty. Boniel sa mga pamahayag ni Senior Prosecutor Juan Pedro Navera sa Department of Justice sa mga gibato nga saway may labot sa pagpadangat og mga pangutana sa na-una ngadto sa witness.

Mipatunga ang huwes sa dihang nagka-initay ang duha ka manlalaban.

Apan wa hatagi og gibug-aton sa habig sa prosecution og wa silay nakita nga major inconsistency sa mga na-unang pamahayag ni Riolito bisan og gibali-bali sa pagpangutana sa kampo sa depensa gumikan kay nagsulte kini sa matuod.

“The prosecution just had the best day in court so far,” tubag sa prosecution lawyer Amando Virgil Ligutan.

Pasabot ni Ligutan sa dihang usa sa abogado sa depensa ang gipasidan-an sa huwes nga magmatngon sa ilang ipangutana nga moresulta unya sa pagkatumbok sa ilang kliyente .

“That was damning for the entire defense team,” dugang pa ni Ligutan.

Si Galeon, sa iyang bahin, masaligon nga ma-dismiss ang kaso batok sa mga sinumbong tungod sa mga wa motukma nga pamahayag ni Riolito atol sa cross examination ngadto sa iyang pinanumpaang pamahayag niadtong Hunyo 13, 2017.

Nasabutan nga sa Enero 18, 2019 sa 1:30 sa hapon ipadayon ang maong husay.