BUAKON sa San Marino Corned Tuna-University of San Carlos (USC) Warriors ug Enervon C/University of Cebu (UC) Webmasters ang ilang panagtabla sa ilang panagharong sa main game karong gabii sa Cesafi-sanctioned 2010 Partner’s Cup seniors division sa Cebu Coliseum.
Ang Warriors ug Webmasters kasamtangang nagbahin sa ikaduhang puwesto nga pulos naggunit og 2-1 nga baraha.
Adunay similaridad ang duha ka mga kampo tungod kay mao ra man nga team ang bugtong nakapildi kanila – ang league leader Ave Maria Sanctuary-University of San Jose Recoletos (USJ-R) Jaguars.
Hinuon bisan pa niini, makonsiderar nga mas taas gihapon ang moral sa Warriors kay human sila nabunyagan og kapildihan batok sa Jaguars, nisagunson man sila’g duha ka mga daog diin lakip sa ilang gibuntog mao ang labing gikahadlukan nga PTT Fuels/University of the Visayas (UV) Green Lancers, 78-74.
Sama sa naandan, ang Warriors magsalig og maayo sa ilang mga pambato nga sila si Giovannie Padillo ug Sam Hermosa samtang ang Webmasters mosandig sab sa ilang higanteng si 6’10” Junmar Fajardo.
Sa laing duwa sa seniors division, magsangka ang parehong nagkaguliyang nga Prime Lending/Don Bosco Technological Center (DBTC) Greywolves ug Aerosol/University of Southern Philippines Foundation (USPF) Panthers.
Sa high school category, mag-abot ang Baby Greywolves batok Baby Panthers sa premirong duwa unya sundan kini sa engkuwentro sa Baby Warriors ug Baby Webmasters.