ANG University of Santo Tomas (UST) B ug University of the Philippines Women's Football Team (UPWFT) X nagpabilin nga way pilid sa ikaduhang adlaw sa 4th Pinay in Action (PIA) Cup sa Tionko field, Barangay 76-A sukad Sabado sa udto, Enero 12.
Ang UST-B mibasura sa Lianga Football Club Without a Pitch sa Surigao del Sur, 13-0, aron nga molambo ngadto sa 3-0-0, daug-tabla-pildi nga rekord sa Group 3.
Samtang ang UPWFT-X midugmok sa Bellas Chikaz sa Kidapawan City, 10-0, aron nga mangulo sa Group 1 sa samang nota nga 3-0-0 kartada.
Ang torneyo pormal nga gibuksan kagahapon uban kang PIA founder Taguig City Rep. Pia Cayetano ug South Region Davao Football Association (SRDFA) official Edgar Te nga nanguna sa ceremonial kick.
Si Cayetano, sa iyang mensahe, nag-awhag sa mga partisipante sa 15 ka mga team liga nga kanunay nga magbilin og maayong impresiyon.
“Wherever you are on field or outside or in school, someone is watching you, waiting for her dream to evolve. You could that be role model for that little girl or little boy,” pung pa niya.
Iya sab nga gidasig sila, pinaagi sa pag-ingon nga sa dihang siya pa naduwa og volleyball sa UP, way motan-aw sa ilang mga tigi apan ang isport karon nahimo nang inila.
“It's nice if there's a lot of people, but if there's none, you play for yourself. There might be one out there inspired by the way you play whatever it is be, the best that you can be on the pitch and out,” dugang pa niya.
Si Cayetano, sa paghinabi sa tigbalita, nagkanayon nga nagduso siya og daghang mga paugnat sa kusog tungod kay nagtuo siya nga ang mga kabataan dunay nagkadaiyang interes apan nagprayoridad sa football kay wala kini magkinahanglan og gitas-on.
“A lot of experts say that the Filipino physique is really made to to excel in football that's why it would be good to expose kids to football at a young age,” pag-esplikar niya.
Samtang, ang CR7 Food Truck sa Davao City misakmit sa ilang ikaduhang kadaugan pinaagi sa pagpukan sa FC 95 Iligan Ladies, 3-0, sa Group 3 bisan og ang PCT Medvil FC naglumos sa Sky Warriors FC sa Maco, Compostela Valley, 6-1, sa Group 1.
Ang UPWT-Y naglukmay sa Tiago FC sa Dapitan, 3-0, samtang ang UST A nagliab sa Baliwasan-Redcorals United FC, 4-1.
Ang group elimination games padayon pa sukad kagahapon sa hapon aron nga madeterminar kon unsang tim moabante ngadto sa quarterfinals, semifinals ug sa kampeyonato nga gitakda karong adlawa. (MLSA)