SECTIONS
Wednesday, June 26, 2019
SUPERBALITA DAVAO

Legario: Dugang nga kasinatian

MGA BIDLISIW SA PAGLAUM

NAKAPAHIYOM ko sa sige og huna-huna nga kaniadtong naa pa ko sa kolehiyo, magsige ko og huna-huna kung unsa na kaha ko pag-abot sa tuig 2019 o 2020. Ug sa akoang pagtoo nga mobalik na ang Ginoo sa dili madugay, dili na tingali moabot pa sa 2019 ang kapanahunan. Apan 2019 na man jud ron, buhi pa pod kaayo ko nga naga-enjoy sa kaayo sa Diyos dinhing kalibutana.

Ug sa nagakadugay ang panahon, samot nakong nadawatan ang kaayo sa Diyos bisan pa sa akong pagkamasinalaypon. Dili man nako mapasalig ang akong pagkabuotan sa tanang higayon, pero Iyang kaayo akong madawatan sa tanang panahon.

Usa sa akong mga kalingawan mao ang paghimo og awit. Ug sa mga programa sa simbahan, ako ang malagmit nga ginapahimo og mga theme songs. Ug tungod kay theme song man, naay mga tema nga dapat basehan ang pagkomposo. Ug dili baya sayon magkomposo nga adunay basehan nga tema.

Apan sa tanang panahon, ang Ginoo gayud maoy naghatag og mga giya aron mahimo ang mga theme songs nga gikinahanglan nga akong mahimo.

Ang makanunayong pag-amping kanako sa akoang Ginoo sa pag-drive matag-adlaw usa pod sa mga butang nga ako Siya nasinati pag-ayo. Sa pipila ka mga beses, ako nakasayud nga kung wala ang Ginoo, dugay na tingali ko nadisgrasya sa pagmaneho. Apan Siya sa kanunay nagalikay kanako gikan sa mga disgrasya, mga dautang drivers, gikan sa mga walay amping nga mga pedestrians. Kaniya, nagapasalamat gayud ako.

Apan ang sitwasiyon nga pinakasinati nako ang akong Diyos mao ang akoang pagkapagaw og tingog hangtud karon. Kining akoang pagkapagaw ako kining nakuha kadtong gi-operahan ko sa dughan milabay na ang onse ka mga tuig, ug sukad ato, ing-ani na gayud ang akoang tingog. Ang ako lang mahibulongan nga panahon nga kinahanglan nako ang akoang tingog sa pagsulti sa pulpito, klaro man daw kaayo ang akoang tingog. Wala man poy nagreklamo nga dili sila makadungog sa akoang tingog panahon nga mosulti ko sa simbahan o bisa'g asang walihanan.

Ako nagapanghinaut nga sa atong kasinatian, atong makaplagan ang dugang nga pag-ila nato sa atoang Ginoo, nga bisan pa sa bisa'g unsang sitwasiyon, atong makita ang Iyang walay puas nga pagpangga kanatong tanan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph