ANG two-time most valuable player (MVP) awardee sa Cebu Schools Athletic Association Foundation, Inc. (Cesafi) collegiate division nga si Rey Suerte nalakip sa mga dagkong pangalan sa 153 ka mga aplikante alang sa 2019 PBA D-League Draft nga ipahigayon karong Martes didto sa Kaulohan.
Si Suerte, graduwado sa Human Resource Management and Development sa University of the Visayas (UV), misumiter sa iyang application niadtong uwahing bahin sa Nobiyembre.
Laing sakop sa Cesafi nga gikatahong mosalmot usab sa maong drafting si John Reel Saycon sa University of San Carlos (USC) Warriors.
Gawas sa iyang duha ka MVP award sa regular season sa Cesafi, nahimo usab siyang Cesafi All-Star MVP sa niaging tuig ug nakabaton og laing MVP award sa 1st Minglanilla Mayor’s Cup Inter-collegiate basketball tournament sa niaging Disyembre.
Ikatugbang ni Suerte sila si Juan Gomez de Liano, Sean Manganti (Adamson), Joshua Munzon (Saigon Heat ug Westport Malaysia Dragon, Jun Manzo ug Santi Santillan nga gikan usab sa UV.
Ang uban mao sila si Jun Manzo (UP), Kib Montalbo (La Salle), Anton Asistio (Ateneo), Jasper Parker (FEU), AC Soberano (San Beda), Ian Alban (Arellano), Jed Mendoza (JRU), ug Orlan Wamar (CEU).
Laing kapilian mao sila si Clint Doliguez sa San Beda, Dan Wong sa Ateneo, Warren Bonifacio sa Mapua ug Troy Rike sa National University.
Ang AMA Online Education maoy unang mopili sa tinuig nga rookie selection sa 28 ka mga teams. JBM