MAG-ABOT ang kanhi mga Commissioner’s Cup champion atol sa opening sa 44th Philippine Basketball Association karong alas 6:30 sa gabii didto sa Philippine Arena sa Bocaue, Bulacan.
Kini pagabidahan sa Barangay Ginebra ug TNT KaTropa kinsa nagtinguha nga makabawi sa ilang maot nga performance sa niaging conference.
Mag-abot usab ang Blackwater Elite ug NorthPort sa unang duwa samtang magbangga sa main game ang Phoenix Petroleum ug Meralco Bolts atol sa unang double header sa 44th season karong adlaw nga Miyerkules didto sa Smart Araneta Coliseum.
Ang San Miguel Beermen ni four time PBA MVP June Mar Fajardo modepensa sa ilang titulo batok sa Columbian Dyip ug pagasundan sa Rain or Shine Elasto Painters ug NLEX Road Warriors sa alas 7 sa gabii didto sa Cuneta Astrodome karong adlaw nga Biyernes
Inig ka Sabado, ang Meralco ug Blackwater mag-abot sa alas 4:30 sa hapon ug sundan TNT ug Phoenix sa alas 6:45 sa gabii didto sa Ynares Sports Center.
Ang Magnolia nga maoy champion sa Governor’s Cup ug Alaska Milk moduwa sa labing unang higayon karong Pebrero 3 diin makontra sa Hotshots ang Texters ug ikabangga sa Aces ang Elasto Painters.
Pagwapahay ug pasexyhay
Giatngan sa tanan atol sa opening mao ang pagpaso sa mga kandidata sa lainglaing team sa PBA nga pagatambungan sa libuan ka mga fans.
Kini pagabituonan ni kanhi Miss Universe winner Pia Wurtzbach, volleyball star Alyssa Valdez ug Megastar Sharon Cuneta kinsa maoy mangulo sa indigay.
Si Wurtzbach nga maoy winner sa 2015 Miss Universe maoy morepresentar sa Barangay Ginebra samtang si Valdez sa NLEX ug si Cuneta para sa Magnolia kinsa nahimo sab kaniadto nga muse sa Crispa (1982) ug Purefoods (1991).
Si Kylie Verzosa para sa San Miguel Beer, si Yam Concepcion para sa Phoenix ug Sam Pinto sa Talk N Text.
Mokumpleto sa sa listahan silang Jasmine Alkhalde, volleyball standout Myla Pablo para sa Blackwater , Aya Fernandez sa Northport ug Klea Pineda sa Alaska.