DIHANG nagtrabaho sa Manila si Neresa Bacalso, nag-novena siya sa Poong Nazareno sa Minor Basilica of the Black Nazarene o mas nailhan nga Quiapo Church sud sa siyam ka Biyernes sugod niadtong Oktubre 2017.
Si Neresa, lumad nga taga siyudad sa Sugbo, nangaliyupo sa milagrusong Poong Nazareno nga kon makabaton siya og anak, siya mag-edad og 26.
Apil sa iyang gihangyo nga makaangkon og maayong trabaho ang iyang maguwang nga si Flordeliz Bacalso-Morales ug naa sa maayong panglawas ang mga miyembro sa ilang pamilya.
Tuod man, natuman ang iyang mga gipangayo. Sa dihang siya nag-edad og 26, siya namabdos ug nakatrabaho usab sa abroad si Flordeliz.
Niadtong Enero 2018, nahibaw-an ni Neresa nga siya mabdos.
Sa sinugdanan, gibati siya og kabalaka, kaguol ug kahadlok tungod sa personal nga rason.
Apan wa siya pasagdi sa iyang pamilya ug giagak siya sa iyang pagmabdos.
“Sige ko og ampo ni God nga “God, imo ning gihatag nako si baby, I pray nga healthy lang gyud siya,” asoy ni Neresa, kinsa sa Sugbo na nipadayon sa iyang pagmabdos.
Dihang nakakita na siya sa resulta sa iyang ultrasound, “naka-feel ko og excitement kay naay baby sud sa akong tiyan.”
Pag-abot sa walo ka buwan, nabantayan sa 27 anyos nga inahan hinay na ang lihok sa bata sud sa iyang tago-angkan hinungdan nga nagpahiling siya og doktor.
Siya gi-admit sa St. Anthony Mother and Child Hospital, siyudad sa Sugbo, niadtong Oktubre 28, 2018.
Ilang nahibaw-an nga suhi ang bata kay nag-una ang tiil.
Tungod niini, siya gipaubos sa Caesarean section niadtong Oktubre 29 ug gihimugso ang usa ka bata nga babaye nga nitimbang og walo ka libras.
Pagkakita niya sa bata, iya dayon gitan-aw ang mga kamot, ug gihikap ang nawong ug ulo.
Iya kining ginganlan og Trexie Mary nga gibunyagan niadtong Disyembre 29, 2018 sa Sto. Tomas de Villanueva Parish sa Barangay Poblacion Pardo, dakbayan sa Sugbo.
Si Neresa nanghinaut nga uban sa tabang sa iyang pamilya, mapadako niya si Trexie Mary nga matinahuron, buotan ug sulundon nga bata.
Siya mapasalamaton sa iyang inahan nga si Petra, mga igsuon nga sila si Flordeliz, Welmar, Nerson, Neria ug Zenaida nga naa kanunay sa iyang kiliran.
Mapasalamaton usab siya sa iyang Ate Aubrey Rose ug mga higala nga sila si Mark ug Clark, ninang ug mga ninong sa iyang anak ug sa mga ig-agaw nga nitabang sa pag-decorate sa ilang balay atol sa selebrasyon.
Ang bunyag gidungan og saulog sa iyang birthday ug sa iyang inahan. SCG