SECTIONS
Tuesday, January 22, 2019
SUPERBALITA CEBU

Sugilanon: Langob ni Ismael

Lamberto G. Ceballos

Cawayan, Dalaguete, Cebu

DUGAY-DUGAY nang nawala si Ismael sa among baryo sa Santa Monica. Milalin siya sa dakbayan sa Sugbo aron didto manimpalad human siya gipul-an pagtikad sa baol kamaisan nga gibilin kaniya ni Nong Sidong, iyang amahan nga namatay kay gisungay pag-unay sa iyang kabaw. Si Manay Mimay, iyang inahan, miagpas kang Nong Sidong human gi-atake sa iyang hubak pagka sunod tuig. Mao nga nag-inusara na lang si Ismael pagbugsay sa iyang sakayan sa dagat sa kinabuhi. Klasmeyt nako siya gikan sa elementarya hangtod sa hayiskol ug suod kami nga managhigala. Dili kami managsilingan kay taga ubos man ko ug siya taga bungtod. Ang ‘taga ubos’ mao kadtong anaa manimuyo sa patag nga lugar sa among baryo; ang ‘taga bungtod’ kay atua manimuyo sa bukirang dapit sa among baryo.

Bag-o lang ko nga nasayod nga nahiuli na si Ismael sa among baryo. Magtutudlo ko sa ‘barangay high school’ sa Santa Monica. May asawa na ko ug duha ka mga anak.

Usa ka buntag sa Dominggo nagkita mi si Ismael sa ‘patio’ sa simbahan sa Sta. Monica. Misimba ko uban sa akong pamilya. Gikan siya sa bulangan nga malipayon kay nakadaog sa tari.

“Hahaha! Kumusta Bay Mael? Yati! Akong tan-aw maayo imong kinabuhi sa siyudad!” timbaya nako. Gipaila ko si Susan, akong asawa, kaniya.

“Okey ra, Bay Leon. Minyo na sab ko. May ‘sari-sari store’ mi didto sa siyudad. Ikaw, maestro na man kuno dinhi sa ato?” ni Ismael. Miyango ko.

Akong nahibaw-an gikan kaniya nga anaa siya mag-estar karon sa balay ni Noy Tiboy, ig-agaw igtagsa ni Nong Sidong, nga maoy nagpadayon pagtikad sa kabilin niyang baol sa mais. Layo-layo kini og diyutay sa ilang payag nga nagusbat na sumala niya. Gidapit ko siya nga mamisita sa amo. Misaad siya nga buhaton kini sa dili pa mobalik sa siyudad sa Sugbo.

Paglabay sa tulo ka adlaw samtang ako nag-dyaging ug nag-hayk usa ka sayong buntag gikan sa ubos paingon sa bungtod nakamatikod ko’g tulo ka mga batan-on nga taga ubos, duha ka lalaki ug usa ka babaye, nga nagsunod nako. Dihang natungod na sila nako ako silang gipangutana, “Asa man mo?”

“Adto mi, Sir, sa langob ni Ismael,” tubag sa babaye nga nakaila nako. “Langob ni Ismael? May langob diay didto?” sukot ko. “Oo, Sir,” gikan sa usa sa mga lalaki. “Didto sa ilang bungtod.”

Samtang naglakaw ko pauli sa amo ang akong hunahuna didto ra sa gisulti sa mga batan-on nga langob ni Ismael. Lat-angan lang og duha o tulo ka adlaw nga way mga batan-on nga mosaka sa bungtod aron pag-adto sa langob kuno ni Ismael sayo sa kabuntagon.

KARONG buntaga sayo kong nag-dyaging sa laguna. Gikan dinhi mohayk ko tungas sa bungtod, apan anha ra ko kutob sa nahimutangan sa dakong duldol. Dili ko molahos ngadto sa ilang Ismael kay layo-layo man. Dihay tulo ka lalaki nga nag-shorts pinaresan og T-shirt nga sa akong pagtuo, nag-dyaging pod.

“Sir, hain ba nang langob ni Ismael?” sukot sa usa kanako.

“Sa akong nahibaw-an kay taga dinhi man ko, wa may langob didto sa ilang Ismael. May baol sa mais hinuon,” tubag ko. Unya nahinumdom ko sa mga batan-on nga akong ikabagat sayo sa buntag mao nga mipuno ko, “Pero may mga batan-on nga akong nakabagat dinhi sayo sa buntag nga adto sila sa langob ni Ismael.”

“Mao na, Sir!” sa lalaki nga maoy nangutana nako. “Moadto mi karon didto.” Aron pagsuta kon tinuod ba nga may langob didto sa bungtod nilang Ismael mikuyog ko sa tulo. “Noy Tiboy, hain diay si Ismael?” Nangutana ko kang Noy Tiboy. “Tua sa ilang payag sa unahan, May kuyog to siyang duha ka batan-ong lalake,” ni Noy Tiboy.

Piskay ming nanglakaw. Pag-abot namo sa payag ni Ismael, kalit nga girumbo sa akong mga kuyog ang sera sa pultahan. Naabli kini. Nakita ko si Ismael nga nagsilbi sa duha ka batan-ong lalake sa nag-aso nga butang diha sa ‘tin foil’ nga iyang gikuptan. Nabuhian ni Ismael ang ‘tin foil.’

Usa sa mga lalake mibinaklid ug mipusas kang Ismael. Ang iyang duha ka kauban mipusas pod sa duha ka batan-ong lalake. Mga pulis diay ang tulo. Gitug-anan ko nila nga si Ismael ‘drug pusher’ nga ‘wanted’ didto sa siyudad sa Sugbo. (Katapusan)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!