PORBIDA ning nga pulitiko no, bisan luyo sa kagul-anan ug kasakit sa uban gumikan sa nasinati nila nga katalagman, sakyan gihapon og pamulitika. Sama diha sa nasunugan sa barangay Duljo-Fatima. Nahimong isyo ang gihimo sa City Hall gumikan kay ang hinabang gikan sa city government gipaagi man sa Barangay Mayor’s Office (BMO) inay sa barangay.
Kining BMO gitukod sa mayor niadtong mga barangay kansang mga barangay kapitan dili kaalyado sa Bando Osmena Pundok Kauswagan (BOPK). Mao ni ang nagdala og gubot sa barangay kay ang taga BMO mao man ang mo-alkontra sa barangay kapitan. Sa nahitabo sa Duljo-Fatima, nanglista og ilang kaugalingon ang BMO nga maoy gibasihan sa Department of Social Welfare and Services (DSWS) sa City Hall. Sila maoy nagbuot sa distribution sa mga pagkaon.
Gumikan lagi kay City Hall ang nagbuot, way nahimo ang mga biktima sa sunog, didto nisunod. Naglibog pa ang mga biktima kay sa layo gipanghatag ang rasyon sa pagkaon,wa sa barangay hall kay oposisyon lagi ang kapitan. Porbida no, wala makonsensiya kining kanahan nga mga pulitiko. Bisan sa kalamidad mopatigbabaw ang pamulitika kay nagsingabot na ang eleksiyon.
Mga kandidato
Dia say mga kandidato sa pagka-senador mipahimulos usab sa panahon. Mitabang kunuhay sila sa mga biktima apan aduna diay mga nagpahiping katuyuan sa pulitika. Sila si kanhi Special Assistant to the President Bong Go og kanhi PNP chief Ronald ‘Bato’ Dela Rosa, kinsa mga kandidato sa pagka-senador ubos sa administrasyon, mibisita kunuhay sa nasunugan. Nanghatag sila og mga relief goods ug mga pagkaon. Nakig-boodle fight pa sa mga nasunugan. Maayo kay nagpakita sila sa ilang pagpakabana ug simpatiya bisan kon dili sila taga Sugbo.
Apan kon di pa sila mga kandidato sa pagka-senador, magpakabana kaha sila? Mopakita kaha sila sa ilang concern? Hinuon, dili kita maka-simba ug maka-kalawat kon unsa ang anaa sa kinauyukang bahin sa ilang kasing-kasing. Pero kon ang tumong nila gumikan sa pamulitika, maka-ingon ko nga ‘opurtunista’ sila. Ilang gisakyan ang kasakit og kagul-anan sa mga biktima gumikan sa ilang pulitikanhong katuyuan. (bobbygnalzaro@gmail.com)