MAHINUNGDANON kining bag-ong balaod nga Republic Act 11166 o ang “Philippine HIV and AIDS Policy Act of 2018” diin mamahimo na nga maka pa HIV test ang 15-19 anyos nga wala’y consent gikan sa ilahang ginikanan.
Kini tungod kay sa Central Visayas pa lang daan, ang age group nga 15-24 mao ang ikaduhang adunay daghang kaso nga positibo niining human immunodeficiency virus (HIV), hinungdan sa Acquired Immune Deficiency Syndrome (Aids).
Ang balaud bag-o lang gipirmahan ni Presidente Rodrigo Duterte.
Matod sa program coordinator niini sa Department of Health (DOH) 7 Dr. Van Phillip Baton nga maayo kini aron dali ma-detect ug mahatagan og angay nga medical nga atensyon.
“The need to diagnose less than 18 years old or minors is needed so that these age group will have easy access to diagnosis, treatment and a better chance at a long and healthy life with ARV,” matod ni Baton.
Ang ARV o Antiretroviral drugs mao ang medikasyon alang sa mga nagpositibo sa HIV diin tibuok kinabuhi na kini nila nga tumaron.
Sa uwahing datus sa Epidemiology Bureau alang sa Central Visayas, aduna’y 213 ka mga tawo nga anaa sa 15-24 nga age group ang nag positibo sa HIV niadtong Enero-Oktubre 2018.
Mao kini ang ikaduhang labing daghan diin nagpabilin ang 25-34 nga age group nga nag-una nga 410 ka tawo ang positibo.
Sukad pa usab niadtong 1984, hangtod karon, ikaduha ning age group nga 15-24 ang adunay daghang nagpositibo sa HIV.
“Based sa data nato second fastest ang 15-24 years old followed by 25-34,” si Baton nagkanayon.
Libre ang pagpatest sa HIV sa tanang health centers sa nasod.
Ug lakip nga libre ang tambal niini sa tanang pampubliko nga tambalanan sa nasod. HBL