TULO na usab ka mga drayber sa pampublikong sakyanan nasakpang tiggamitan og illegal nga drugas human sa gipahigayong roadside drug test kagahapon sa may North Reclamation Area, siyudad sa Sugbo.
Matod ni LTO-7 director Raul Aguilos nga sa 30 ka mga drayber sa public utility vehicle nga ilang gipara, tulo niini ang nigawas nga positibo.
Ang roadside drug test maoy usa sa mga kalihukan nga gipahigayon sa LTO kagahapon uban sa lain pang mga programa nga ilang gilusad dinhi sa Sugbo.
Si Asst. Secretary Arturo Lomibao nisaksi sa gihimong roadside drug test ug nitambong sa launching sa ilang citizen’s charter ug sa gilusad nilang call of duty.
Ang citizen’s charter pinasubay sa Republic Act 9485 kun anti-red tape act diin gimandoan ang mga government agency sa pagbutang og poster gawas sa ilang buhatan nga maglatid sa ilang mga serbisyo, kinsa ang tawong duolon ug kon unsa ang gidugayon sa proseso.
Matod ni Lomibao nga pinaagi sa citizen’s charter maminusan na ang pagkatap sa fixer sa ilang ahensiya.
Giangkon ni Lomibao nga ang LTO maoy usa sa mga ahensiya sa gobyerno nga gihugopan og daghang fixer.
Samtang gitambungan usab ni Lomibao ang paglusad sa call of duty sa LTO-7 diin namilit sila og mga poster sa mga pampublikong sakyanan. “We encourage the public to report reckless and abusive driver. Kon naa silay makit-an diha sa kadalanan mahimo nilang itawag sa atong telepono,” matod ni Aguilos.
Subli usab nga gilusad ang text hotline sa LTO diin ang dunay mga reklamo batok sa abusadong mga drayber mahimong ipadala pinaagi sa pagtext sa “TEXT HELP” ilang mensahe ug ipadala sa 2600.
Matod ni Lomibao nga ilang gihingusgan ug gipalapdan ang ilang mga road safety program tungod sa padayong pagsaka sa gidaghanon sa mga vehicular accident diin 5 porsiyento ang pagsaka sa mga aksidente sa kadalanan sa matag tuig.