GIPANIGURO sa National Food Authority sa Northern Mindanao (NFA-R10) nga walay angayang ikabalaka ang katawhan tungod kay wala nagkulang ang suplay sa bugas dinhi sa rehiyon ug ubay-ubay pa ang anaa sa bodega ug sa pantalan.
Gibutyag ni Helen Fernandez, Grains Retailers Association of the Philippines (GRECON) regional president, nga sugod niadtong nilabay nga semana hinay-hinay nga nahurot ang suplay sa bugas gumikan kay gimenusan sa NFA ang alokasiyon ngadto sa mga retailers.
“Wala na ta’y stock sukad kagahapon tungod kay from 140 ang atong stcok gihimo nalang 60 mao nang sa usa ka semana before sa pasko, ang sulti sa NFA nga gi-menusan ang alokasiyon tungod kay walapay bugas gi-abot pero kaorn naa na murag mga 2 days ago,gikan sa barko,” pahayag ni Fernandez sa interbyu sa usa ka radyo.
Samtang giklaro usab ni Hazel Belacho, NFA-Northern Mindanao information officer sa pakighinabi sa Sun.Star Superbalita nga gimenusan usab sa ilang buhatan ang alokasiyon alang sa kaayohan sa mga mag-uuma ilabi na nga panahon man sa pag-harvest sa mga palay ug ila usab nga gi-inat ang gikan sa inventory aron nga kung duna’y pagkadelatar duna pa sila’y igong suplay.
“Basin mataranta ang mga tawo, kamulo pa og harvest ang uban di mi gusto mo compete sa farmers kay kung magpatuyang pud mi og pabaha ang mga farmers masuko pud sila gawas ana ang among investnory amo pud nang gi stretch pa kay what if ana ga delay-delay,” matud ni Belacho.
“Ang about sa nagkulang ang supply sa NFA sa karon naa pa ta’y sakto nga inventory diha sa bodega nato, naa na diha sa pantalan sige man gud og ulan-ulan karon so wala pa nasugdan og unload,” dugang ni Belacho.
Gidugang pa usab niini nga sulod sa dako nga vessels nga anaa sa pantalan mokabat sa 534 mil bag ug 120 mil sa gamay nga vessel samtang ang 67 mil ang ihatag kini sa Lanao del Sur nga molungtad pa kini og mga unom ngadto sa walo ka bulan.
“Modagan na siya og 6 to 8 months, kanang atong inventory nato daan karon plus kanang naa sa pantalan, karon sugdan naman unta na og unload kaso ga ulan–ulan, gikan na sa Thailand,” dugang ni Belacho.
Gipasalig usab sa bag-ong Regional Director Genaro Nuñez sa NFA-10 nga dili na subling masinatian ang susama sa nilabay nga tuig 2018 diin sa pagbukas sa bag-ong tuig nga nakasinati og kakulangon sa suplay sa bugas ang rehiyon.
“We will not have another scenario of the opening of new semester like what we had on rice situation at the opening of new year last 2018,” matud ni Nuñez.