GIKATAKDANG ipatuman sa Land Transportation Franchising and Regulatory Board (LTFRB) sa Northern Mindanao (Region 10) ang “no-standing policy” sa mga bus dinhi sa rehiyon.
Kini human gipatuman na kini sa Luzon ug Visayas.
Matud ni Regional Director Allan Guro nga gikinahanglan sa mga bus lakip kining mga van ug uban pa nga mga sakyanan nga motuman sa setting capacity sa ilang mga sakyanan.
Gani gikakurat niini ang viral post sa storya sa Sun.Star Cebu nga nanghigda na ang mga pasahero diha sa tunga tungod sa pagbawal sa no standing policy.
Bisan pa niini dili kini mahimo kay daw dalan kini sa pasahero labina sa mga manganaog gikinahanglan gyod nga bakante ang tunga niini ug mosunod sa insaktong polisiya ang mga bus.
“Dili na pwede ang magtindog labina gyod kong taas ang oras sa biyahe kay dili maayo sa panglawas sa pasahero ug dili sila komportable,” matud ni Guro gawas lamang kon ang biyahe dili mominos sa 15 minutos.
Sutaon sa taga LTFRB ang mga dyip ug mga bus nga mosupak niining polisiya nga gidili ang pagtindog.