DILI na kalikayan ang atong paghisgot sa dagan sa politika sa atong palibot karong panahona, sanglit nagkaduol na ang bugnong-lugaynon karong Mayo 13, ning tuiga 2019.
Duha ka probinsiya sa Davao region ang hilabihan ka-init sa politika kini mao ang Davao del Sur ug Davao del Norte.
Atong unahon paghisgut ang lalawigan sa Davao del Sur kung diin duha lang ang nag-engkwentro sa pagka-gobyernador, og mao si incumbent governor Douglas “Dodo” Cagas, ug si Mayor Joseph Peñas sa Digos City.
Si Peñas anaa sa partido nga gimugna ni Davao City Mayor Sara Duterte-Carpio, ang Hugpong Nang Pagbabago (HNP), ug si governor Dodo Cagas ana sa partido sa amahan, ang atong presidente Rodrigo Duterte, ang Partido Demokratiko Pilipino–Lakas ng Bayan (PDP-Laban).
Ang katawhan sa Davao del Sur, dili gyud motuo nga gi-endorso sa atong presidente si Mayor Peñas sa katarungan nga di sila ka-partido, pero, ang gibuhat karon ni Peñas, nagpakatag og mga dagkong billboard sa bisag asang dapit sa Davao del Sur, nga nagtupad sa atong presidente nga nagkumo-kumo sa ilang kamot.
Pero ang tinuod, si Mayor Sara lang ang nag-endorso sa iya isip official nga kandidato sa HNP, ug walay labot si PRRD, tungod kay ang iyang kandidato pagka-gobernador diha sa probinsya sa DavSur, mao man si Governor Cagas.
Nagpalaban sa presidente si Mayor Peñas, wala makontento sa pag-edorso kaniya ni Mayor Sara, nganong gibuhat man kini ni Peñas? Nakulbaan? Wala na’y pagsalig sa iyang kandidtura? Mao nga nagpalaban sa anak nga maoy atong mayor sa Davao? Ug di pa gyud kontento giduol pa ang amahan.
Samtang sa laing bahin, gikahinabi sa mga sakop sa media si Cagas, ug ang iyang tubag simpol lang kaayo, matud pa niya, sulod sa dugay nang panahon sa kasaysayan sa iyang pamolitika sa Davao del Sur, never nga magpalaban siya og mga dagkong politiko, kung dili, ang katawhan sa DavSur didto siya magpalaban, sanglit katawhan kuno mao ang labing nasayod kung unsay iyang gibuhat isip amahan sa probinsya.
Karon, atong lakbitan ang probinsiya sa Davao del Norte, giingong walay pagkahubas ang kwarta ni Congressman Pantaleon Alvarez, matud pa sa mga kauban nato sa buhat didto, alegasyon nga gipamalit na niya ang mga media didto og tag P2 milyon aron himuon nga tigsibya.
Ingon niini kahugaw ang mga bag-ong salta sa politika sa Davao del Norte nga sa ilang pagtan-aw, mga nawong ug kuwarta ang mga lumolupyo sa maong probinsiya.
Matud pa’s karaang panultihon, "kan-a ang paon, apan iluwa ang taga", tingali nasabtan ninyo kon unsay buot ipasabot, ayaw ibaligya ang imong bulawanong katungod.