GIMANDO ni Department of Education (DepEd) director Recaredo Borgonia nga kuralon na ang pampublikong mga tunghaan ug way pasudlong mga bisita nga di moagi sa principal.

Kini maoy usa sa mga lakang nga gihimo sa DepEd human sa pagpusil-patay sa magtutudlong si Romeo Duran sud mismo sa iyang classroom sa Binlod Elementary School, lungsod sa Argao.

Click here for stories and updates on the Sinulog 2010 Festival.

Matod ni Borgonia nga kinahanglang usa ra gyuy entrance-exit sa mga tunghaan aron ma-monitor ang tanang mga tawo nga mosud.

Kon bisita, kinahanglang moagi kini sa principal’s office, mosuwat sa logbook ug mopakita og ID aron kini mailhan ug mahibaw-an kon kinsa ug unsa ang iyang tuyo.

“Kon usa lang ka tinun-an ang iyang tuyo, mahimo ra mang ang maong tinun-an maoy pagawason. Di na kinahanglang ang bisita maoy pasudlon sa classroom,” nagkanayon si Borgonia.

Kon makahuwat usab ang bisita, pahuwaton lang kini nga maatubang ang iyang tuyo atol sa break ug di gyud panahon sa tingklase.

Mohangyo usab ang DepEd sa mga barangay nga pabutangan na og tanod ang mga tunghaan di lang panahon sa kagabhion kon di apil na mismo sa adlawan.

Matod niya nga magpadala usab siya og suwat-hangyo kang PRO-7 Director Lani-o Nerez nga kon mahimo pasuroyan usab og mga pulis ang mga tunghaan isip police visibility.

“Although we understand nga kuwang sila og mga tawo, pero I know supportive kaayo ang atong kapulisan,” nagkanayon si Borgonia.

Gawas sa mga magtutudlo nga nisaad nga motabang sa imbestigasyon sa kaso sanglit nakit-an man gyud sa uban ang gunman, gitugot ra usab hinuon nga mosaksi ang ubang mga tinun-an.

Apan hangyo ni Borgonia nga ang tinun-ang sukit-sukiton isanghid gyud sa ilang ginikanan ug kon sila interviewhon, kinahanglang sa presensiya sa ilang ginikanan.

Gipaobserbahan na usab ni Borgonia ang mga tinun-an kay kon kinsa kanila ang mopakita og abnormal behavior epekto sa ilang nasaksihang krimen, kini maoy ipaubos sa psychological therapy.

Hinuon kagahapon sa buntag, duna nay 11 ka mga tinun-an ni Duran ang nibalik og tungha ug kini giipon sa laing klase.

Apan sa 326 ka mga estudyante sa tunghaan, moabot lang sa 68 ang nitunga kagahapon sa buntag. “Bisan gamay ra ang nitunga padayon gihapon ang klase kay maapektohan man usab ang ubang klase,”pasabot ni Borgonia.(CPL)