IPADAYON sa Kapitolyo ang binuwan nga pagbayad sa suweldo sa casual employees taliwala sa advise nga nadawat sa provincial government gikan sa Civil Service Commission (CSC) nga himuong inadlaw o daily ang ilang suhol.
Giingong may lagda ang Department of Budget and Management (DBM) nga maoy gibasehan sa CSC sa ilang advise nga hiumuong inadlaw ang ilang suweldo.
Matod ni Provincial Human Resource Office (PHRO) Bhobby Nacorda, magpadala ang Kapitolyo og suwat sa CSC aron ipasabot ang ilang basehanan pagpahatag og binuwan nga suweldo sa mga kaswal nga empleyado sa Kapitolyo.
Sigun ni Nacorda, nga kung basehan usab ang labing uwahi nga notice of salary adjustment gikan gihapon sa DBM sa miaging tuig, gihatagan ug kagawasan ang LGU pag-sueldo o binuwan o kaha inadlaw sa ilang mga casual employee.
Dugang niya, anaa usab sa career service ang maong mga kawani busa, angayang himuon nga monthly ang ilang sweldo, diin makadawat gihapon sila ug holiday pay sama sa mga regular nga empleyado.
“Kay ug dili sila monthly-paid, murag naay 10 ka days nga dili sila paid for regular holidays, paid only for special which is para sa akoa, dapat pud paid sila. Kay the fact that they are enjoying a career service, the compensation must be treated equally or fairly as that of regulars,” niingon si Nacorda ngadto sa Superbalita Cebu. (AZLG)