GITATAW sa Human Resource Management Office sa Kapitolyo nga way bulok pulitika ang wala na pag-renew sa mga kontrata sa 17 ka mga job order nga nadestino sa mga buhatan sa Provincial Board Members sa Sugbo sugod niadtong Enero 1.
“Ako kasabot man ko nga election is coming. Due to my mandate as HRMO, plus the fact that our office has been recognized by Civil Service (Commission), meaning naa koy accreditation nga giprotektaan pud. So, hiring of personnel has never been political to me. I’ve always been very objected that I only cater within the limited budget to the vacancies that are integral sa day to day operations of the agency,” matod ni Bonifer “Bobby” Nacorda, pangu sa HRMO sa Kapitolyo.
Kini ang katin-awan sa maong opisyal human nigawas ang column sa tri-media personality nga si Bobby Nalzaro sa SunStar Cebu niadtong Enero 9 nga nag-ulohan, “Davide’s Resbak”.
Sa maong column, gisuwat ni Nalzaro nga nibawos si Gobernador Hilario Davide III sa mga bokal nga wala moboto pabor sa resolution nga maghatag niya og pagtugot nga mosud og kontrata tali sa nidaug nga bidder alang sa katukoran sa P1.3 bilyones nga resource center sa Capitol compound.
Si Nacorda nipasabot nahuman na ang mga trabahuon sa job order nga mga kawani ubos sa lainlaing mga buhatan sa mga bokal ug ang pundo nga gigamit alang sa ilang suhulan gamiton aron mag-abli og daghang mga position nga mahinungdanon sa mga provincial ug district hospitals nga gipadagan sa kagamhanan sa lalawigan sa Sugbo sanglit nag-una nga prayoridad sa administrasyon ni Gobernador Hilario Davide III ang serbisyo sa panglawas.
Sumala ni Nacorda matag board member dunay 11 ka organic personnel apan, tungod sa mga proyekto ug mga trabahuon sa mga opisina niini, nanginahanglan og temporaryo nga tabang, nadungagan ang maong gidaghanon ug ang budget nga alang sa sweldo sa mga job order gipahuwam gikan sa buhatan sa Provincial Administrator.
“So, daghan gyud kaayo ang panginahanglanon karon for additional personnel sa mga hospital. Sa katong gipahuwam, so atong gi-recall na but their eleven are intact,” dugang ni Nacorda kinsa niingon dihang nahinabi sa Superbalita Cebu.
Siya nidugang ang uban sa mga job order kay dili molabaw sa tulo ka tuig ang pagtrabaho sa Kapitolyo diin matag unom ka buwan i-renew ang ilang mga kontrata.
Gitataw usab ni Nacorda nga mahimo hinuon mo-apply og laing bakanteng mga trabaho ang mga job order kansang mga kontrata kutob na lang niadtong Disyembre 31, 2017 ug wala na ma-renew sa bag-ong tuig.
Sila si PB Members Sun Shimura ug Raul Bacaltos nikompirmar nga duha sa ilang mga job order ang wala na ma-renew ang kontrata sugod niadtong Enero 1.
Ang duha apil sa unom ka mga bokal nga nibotar batok sa pagpalabang sa resolution nga maghatag og pagtugot ni Davide nga mosud og kontrata sa nidaug bidder alang sa pagtukod sa resource center.
Ang laing upat mao sila si Bokal Edsel Galeos, Victoria Corominas-Toribio, Yolanda Daan ug Alex Binghay.
Samtang ang walo nga niaprobar sa resolution mao sila si Bokal Miguel Antonio Magpale, Celestino Martinez III, Jerome Librando, Jose Mari Salvador, Horacio Franco, Jude Thaddeus Sybico, Earl Tidy Oyas ug Jerico Rubio.
Samtang ni-abstain sila si Christopher Baricuatro, Glenn Bercede ug Jovito “Jonkie” Ouano.
Si Rubio niingon nga wala makuhai ang iyang mga job order nga staff.
Si Shimura namahayag nga luoy ang iyang duha ka mga staff nga gipangtang kay kini maoy tig follow-up sa mga resolutions sa barangay nga sakop sa iyang distrito.
Apan siya nagtuo nga gumikan kay panahon na karon sa pulitika.
Si Bacaltos sa iyang bahin niingon nga prerogative sa gobernador ug bise gobernador kon aprobahan ang ilang gi-request nga mga job order nga empleyado.
“Kami, igo ra mi mo-request nga masud ang among mga tawo as j.o,” dugang sa bokal sa unang distrito.
Sumala ni Magpale nga wala siya mahibawo bahin niini ug iya kining susihon karong adlawa kon pila ka job order ang wala na ma-renew ang kontrata.
Si Kongresista Gwen Garcia nga nakasaway sa nahitabo sa mga job order.
“And he says my objections against the “Torre ni David-e” are politically- otivated? Kinsa naman karon ang namulitika, giamung-among ang JOs sa mga Board Members nga wala mouyon niya?” text message niya ning mantalaan. (B)