GIPANINGUHA karon sa Cebu Provincial Anti-Drug Abuse Office (CPADAO) nga ma-convene ning tuiga ang rehiyonal nga anti-drug abuse council sa Central Visayas (CV).
Kini subay usab sa tinguha nga matubag ang suliran sa transhipment sa ilegal nga drugas agi sa nagkadaiyang pantalanan sa Sugbo ug mga silingang lalawigan.
Gihulagway ni CPADAO Executive Director Ivy Durano nga nagpabiling dakong hagit ang in-and-out sa drug supply dinhi sa Sugbo ug ubang dapit sa rehiyon tungod usab sa daghang pantalan nga kaagi-an ug kasudlan niini.
Sa laing bahin, dakong hagit sab alang sa CPADAO ang umaabot nga eleksiyon sa buwan sa Mayo kay kini nagpasabot nga duna na sab unyay bag-ong mga opisyal nga mapili ug posibleng mausab ang komposisyon sa mga local ADAC sa kalungsuran ug mga siyudad nga sakop sa probinsiya sa Sugbo.
Matod ni Durano, importante nga dunay sustainability sa ilang mga programa ilabi na sa demand reduction ug nanghinaot siya nga susamang kooperasyon ang ipakita sa mga bag-o unya mapili nga mga opsiyal pag-adrress sa sulrian sa drugas sa ilang mga dapit.
Samtang, dili gihapon makadali-dali ang CPADAO sa pagpaubos sa mga magtutudlo ug ubang sakop sa Department of Education (DepEd) sa random drug testing, subay sa drug-free workplace program sa gobiyerno.
Kini tungod sa mga palisiya ug proseso sa DEPED nga kinahanglang agi-an una makapahigayon ug drug test diha sa mga tunghaan.
Matod ni Durano, dunay kaugalingong proseso ang maong ahensiya alang sa drug test ug dili kini susama kasayon sa ubang mga ahensiya sa gobiyerno o sa mga local government unit, diin ang mga head of office lang ang mo request ngadto sa ilang opisina.
Pabiling giila sa CPADAO ang importansiya pagpahigayon og drug test alang s amga teachning ug non teaching personnel kay sila may mamahimong ikaduhang ginikanan sa mga bata nga nagtungha.
Sa miaging tuig, diha nay pipila ka mga eskwelahan sa probinsiya sa Sugbo ang napaubos sa drug test apan dili kini susama kadaghan sa mga LGU. (AZLG)