VIVA Senyor Santo Niño diha sa Shrine Hills ug Pit Senyor didto sa Cebu. Magmahal ang pagkaon kung may dagkong okasyon.

Niadtong Pasko ug bag-ong tuig. Imbis nagplano mi og litson baboy, litson karahay o crispy pata na lang. Imbis lukon, mantiner na lang mi og pasayan nga pula ang mata. Ice cream nga ginalon, ice cream nga “flavor of the road” na lang tawon.

Ang plano nga alimango sa Surigao, giilisdan og lambay nga niwang sa Agdao. Inay nga mopalit mi'g tarutot para maghimo'g kasikas, taklob na lang sa kaldero ug arinola pakapinan og sintunadong taghoy.

Moabot og tag P5,000-P10,000 ang presyo sa tibuok litson. Naa pay binuang sa ubang litsonero, puwera sa maayo nga laplapan daan og unod ang tiyan ug bukobuko sa baboy dayon butangan og bani sa saging aron dili mohupyak nga daw gimalnuris.

Pagsulod niini sa nindot nga karton nga may tatak sa nagluto, presto mahal na kaayo.

Ang ubang litson diri sa Davao gidala pa sa Cebu, Manila ug bisan asang dapit sa Pilipinas pinaagi sa eroplano.

Ang akong higala nga si Fred Pontillo nga kanhi pangabaga ni Sec. Wendell Avisado, presidential assistant on special concerns ni PRody nagkapuliki og padala og litson didto sa Manila para sa mga kalihukan sa iyang bossing. Di daw mohatag og laing litson si Sec. Avisado kon dili ang litson nga gikan sa Davao.

Apan kahibalo ba mo nga may super mahal nga bariles didto sa Japan?

Sa kuwarta sa Pilipinas, moabot og sobra P500,000 ang kada kilo ang presyo sa giant Bluefin tuna nga gisubasta (auction) sa Toyosu fish market sa Tokyo niadtong bag-ong tuig.

Bariles kini nga didto makuha sa Atlantic Ocean ug northern seas samtang Yellow Fin tuna ang sagad makuha sa Pacific Ocean ug sa south Philippine sea.

Ang tag-iya sa Japanese sushi restaurant nga Sushizanmai nga si Kiyoshi Kimura nibayad og 333.6 milyon yen o US$3.1 milyon o P161,200,000 sa 278-kg nga isda.

Sa atong kuwarta, moabot og P579,856 ang kilo niini nga puwede na natong ikapalit og nindot nga sakyanan bisan kung second-hand lang.

Gibuak ni Mr. Kiyoshi Kimura ang iyang kanhi record sa pagpalit og susamang bariles niadtong 2013 nga mokabat la'g lapas 100 milyon yen.

Ginahimong lamian nga shusi ang maong isda nga kinaham kaayo sa mga Japanese nga mobayad og linibo aron lang makatilaw niini. Unsa kahay lami niini kung atong ipaksiw nga may suka, ahos ug asin, o kaha sabwan nga may dahon sa kalamunggay?

Human sa pagsubasta, gidala gilayon ang isda sa usa ka branch sa Sushizanmai diin nagpaabot ang gatusan ka mga kustomer nga gusto motilaw sa pinakamahal nga isda sa kalibutan.

Giseguro ni Kiyoshi Kimura nga siya ang makadaug sa subasta kay napildi siya sa laing bidder niadtong niaging tuig.

Sa mga nakatilaw na sa Bluefin tuna makaingon gyud sila nga namit ug lamian ang maong isda ug layo ra sa Yellowfin nato diri.

Apan kung akoy papilion, diri na lang ko sa barileson nga lami paksiwon ug sabwan ang ulo.