LAAK, ComVal Province -- Usa ka halapad nga imbestigasyon ang gilusad sa kapulisan sa pagpusil-patay sa Sangguniang Kabataan (SK) councilor sa Purok 2, Barangay El Papa.
Segun sa taho sa kapulisan, alas 8:30 sa buntag niadtong Sabado, Enero 12, midangat sa Laak Municipal Police Station si Melchor Tisbre, 56, kapitan sa Barangay El Papa ug gipaimbestigahan ang gidangatan sa biktima.
Ang biktima giila nga si John Loyd Plasabas, 21, mag-uuma, ug SK councilor sa Barangay El Papa.
Ang imbestigasyon sa Laak MPS nagkanayon, alas 9 sa gabii niadtong Biyernes, ang biktima nangape sud sa ilang panimalay dihang gitawag sa wala mailhing mamumuno.
Dihang giablihan sa biktima ang pultahan kalit siya nga gipusil sa lalaki.
Nahiagom og duha ka samad pinusilan sa ulo ang biktima nga misangpot sa iyang hinanaling kamatayon.
Ang mga responsable paspas sab nga miiktad paingon sa Barangay El Katipunan.
Ang patay’ng lawas sa biktima gihaya sa ilang panimalay diin hangtud karon padayon ang makuting imbestigasyon sa Laak MPS sa panghitabo.