DAGHANANG Kapuso stars ang naa sa Sinulog 2019. Nag-una sa listahan ang cast sa “Cain at Abel.”
Ang mall show nila sa Gaisano Fiesta Mall Tabunok ug Robinsons Galleria karong Sabado.
Ang mga bida nga silang Dingdong Dantes ug Dennis Trillo kauban silang Solenn Heussaff ug Sanya Lopez ang manakay sa float karong Dominggo.
Samtang sa Biyernes, naa sad ang cast sa “Inagaw na Bituin” sa Ayala Cebu Terraces ug Gaisano Grand Jai-Alai nga silang Kyline Alcantara ug Therese Malvar ug ang cast sa “Kara-Mia” nga silang Barbie Forteza, Mika dela Cruz, Jak Roberto ug Paul Salas.
Pit Senyor sa tanan!
Ngohiong
Sa mga suki sa Chinese Ngohiong sa dalan Junquera nga paboritong kan-anan ning nag-angat ang kapistahan sa Sinulog dunay gi-anunsyo ang tag-iya nga si Mrs. Joy.
Di na kuno mahimong mo-parking atubangan sa ilang tindahan. Ang mga dunay sakyanan nga gustong mo-take out hatagan ra og priority number ug balikon ra sa gisabotan ninyong oras.
Kini aron paglikay sa traffic. Lami man gud ni ilang Ngohiong ug batikon mao nga taas pirme ang linya. Sauce pa more! Hehe...
Tayog-tayog
Nalingaw ko sa mga comment sa Facebook nga nag-atang sad sa “Tayog-tayog” ni Miss Jessica Soho niadtong Dominggo sa “ghost ship” nga magpakita kuno matag-tungang gabii sa dagat sa Siquijor.
Usa sad ko sa naghinamhinam ug namuti ang mata sa pagpinaabot sa kataas sa ilang commercial.
Ang ending? Basin reflection ra diay sa suga. Pastilan! Pero in fairness nindot ang interbyu ni Miss Jessica kang Miss Universe Catriona Gray.
Pero di to “tayog” ma’am ha. Kundi tay-og as in “shake-up. Hehe...
Campaign Period
Ang mga nikandidato sa national position sa May 13 midterm election di na mahimong mogawas sa pelikula o telebisyon atol sa campaign period nga magsugod Pebrero 12 hangtod Mayo 11.
Nagpasabot ba ni nga hasta si Lito Lapid nga nidagan pagka-senador di na sad mahimong mogawas sa Ang Probinsyano atol sa campaign period?
Di lang si Lito Lapid kundi hasta ang iyang anak nga si Mark, Jhong Hilario, Roderick Paulate ug Edu Manzano nga puros naa sa Ang Probinsyano ang maapektohan sa higayon nga magsugod na ang election period sa tanang kandidato sa Marso 30.
For sure duha ray padulngan sa ilang karakter, kundi mapriso aw patay! Mao ning panahona nga moirog na gyud ang ilang estorya. Finally!