GIDEKLARAR sa Commission on Elections (Comelec) nga election period sugod niadtong Dominggo, Enero 13, hangtod sa Hunyo 12. Wala pay campaign period ha. Kay ang campaign period para sa modagan sa pagka-senador ug partylist groups, 90 ka adlaw sa dili pa ang eleksiyon. Unya 45 ka adlaw sa mga local candidates apil na ang mga kongresista. Pero nagsigi na ang kampanya kay wa may prohibition ang Comelec.
Taas ang gintang sa pag-file sa mga certificates of candidacy (COC) hangtod sa pagsugod sa kampaniya. Ug kay election period naman, daghan na ang angayan natong sundon. Una, kining pagdala og armas de fuego sa gawas bisan adunay license to possess ug permit to carry outside of residence. Unya daghan nang nga checkpoint ang atong kapulisan.
Ania ang pipila ka mga giya sa magpahigayon og checkpoint ug ang atong katungod.
1) Gikinahanglan nga ang mga pulis anha magbutang og checkpoint sa hayag nga lugar. Unipormado ang mga nagdumala niini.
2) Kon magkaduol kana sa checkpoint, pahinay og padagan sa imong sakyanan, i-dim ang headlights ug pasigaha ang mga suga sa sud nga bahin.
3) Ayaw og gawas sa imong sakyanan.
4) I-locked ang tanang pultahan gumikan kay makita sa iyang panan-aw ang puwede nga himoon sa kapulisan.
5) Ayaw tuguti nga mopahigayon og body search o kapkapan ka sa mga awtoridad.
6) Dili ka puwedeng pugson pag-abre sa glove compartment o trunks o bag sa imong sakyanan.
7) Pagpakita hinuon og respeto sa mga awtoridad, lig-on ang imong mga tinubagan sa mga pangutana, i-insister ang imong mga katungod, presence of mind ug ayaw karatol.
8) Andama kanunay ang imong driver’s license ug ang registration sa imong sakyanan.
9) Andama kanunay ang imong cellular phones labi na ang mga emergency dial numbers o imong mga higala aron aduna kay kasumbongan kon adunay mga abuso.
10) Itaho dayon kon adunay mga violations o kalapasan sa imong tawhanong katungod. (bobbygnalzaro@gmail.com)