KAGAMHANAN sa dakbayan sa Mandaue mopasaka og kaso batok sa Davao City Environmental Care Inc. human nipagawas sila og cease and desist order (CDO) batok niini niadtong Biyernes, Enero 11.
Ang CDO ilang gi-serve niadtong Biyernes, Enero 11.
Matod sa pangulo sa Mandaue City Environment and Natural Resources Office (CENRO), Architect Araceli Barlam, karong semanaha i-rekomendar nila sa Mandaue City Legal Office ang pagpasaka sa kaso.
Mga kaso sa kalapasan sa pipila ka probisyon sa Philippine Clean Water Act kun Republic Act 6969 ug kalapasan sa R.A. 9003 kun Ecological Solid Waste Management ang ipasaka.
Niadtong Biyernes, giadyo sa Cenro ang pasilidad sa DCECI nga nahimutang sa gipasirad-an na nga Umapad dumpsite sa Barangay Umapad, dakbayan sa Mandaue.
Daan na nga gitug-an ni Barlam nga aduna gyud silay nakita nga mga kalapasan.
Sama sa paglapas niini sa City Ordinance #14-2017-1221 (implementing stiffer penalties and fines for solid or liquid waste management and disposal and for other purposes), diha sa section c, nga mao ang paglabay sa basura gawas sa giuyunan sa balaud nga pasilidad.
Laing nalapas mao ang sa Section E, sa City ordinance nga mao ang pag-kolekta ug pagbyahe sa solid, liquid, hazardous/infectious nga basura nga way Environmental Transport permit nga giisyu sa City mayor. FMD