MOABOT na sa 48 ka mga gas retail outlets kun 2.72 porsyento sa kinatibuk-ang 1,759 nga nahimutang sa Visayas, ang pasiunang ningpatuman na sa dugang excise tax sa presyo sa mga produkto sa petrulyo ubos sa Tax Reform for Acceleration and Inclusion (Train) Law.
Si Engr. Jose Rey Maleza, pangu sa Energy Industry Management Division sa DOE Visayas, nibutyag ang uban niini nipaumento na sa presyo sa ilang mga produkto sugod niadto pang unang semana sa Enero.
Sa 48 ka retail outlets, 19 ang naa sa Sugbo, 19 sa Bohol, 7 sa Negros Oriental ug tulo sa laing mga rehiyon sa Kabisay-an nga sakop sa hurisdiksyon sa DOE Visayas.
Ang 19 ka retail outlets nga nipausbaw na sa ilang presyo kay 4.4 porsyento pa lang sa kinatibuk-ang 424 nga naa dinhi sa Sugbo.
Sugod niadtong Enero 1, niepekto na ang ikaduhang tranche sa Train Law. Kini nagpahamtang og dugang P2 nga excise tax sa matag litro sa diesel ug gasolina, P1 sa matag litro sa kerosene, ug P1 sa matag kilo sa liquefied petroleum gas (LPG).
Sumala ni Maleza, ang 48 ka retail outlets alang sa inspeksyon sanglit kini ang nipahibawo nga nagsugod na sila og paumento sa presyo sa ilang mga produkto human nahurot na ang ilang daang buffer stock sa miaging tuig.
Sa 1,759 ka retail outlets sa Kabisay-an, 682 niini ang naa sa Central Visayas ug 424 ang naa sa Sugbo.
Matod ni Maleza, pito sa 48 ka retail outlets ang kabahin sa 444 ka gas stations lukop nasod nga unang nipatuman sugod sa unang semana sa Enero ug gipatubag kon nganong sayo sila nipaumento.
“Mao nang gipadal-an sila og show cause order to let them explain nga with attachment. So, that ang doubt bitaw ma-eliminate,” pahayag ni Maleza dihang nahinabi sa Superbalita Cebu pagka Lunes, Enero 14.
Matod niya ang 48 ka retail outlets kay gikan sa upat ka dagkong mga kompaniya sa lana sa nasod nga mao ang Petron, Shell, Caltex ug Flying V samtang wala pa mopausbaw ang gagmay nga mga kompaniya o gitawag og independent petroleum players.
Si Maleza namahayag ang 48 ka retail outlets mao ang pasiunang nipahibawo sa ilang ulohang buhatan nga nagsugod na sila og umento ug ang ilang ulohang buhatan ang moabiso nila aron ma-validate kon tinuoray ba nga nahurot na ang buffer stock sa mga kompaniya sa lana.
“Ang main purpose sa DOE why we should investigate kay i-make sure nga katong ni-impose sa additional tax justifiable gyud dili tungod kay naa nay 2nd tranche, automatic mopuno sila when in fact kana ilahang stock is 2018 pa. So imagine P2 per liter ang imong ipasaka,” pahayag niini.