KASONG annulment of deed of sale ang pormal na nga giduso sa kagamhanan sa dakbayan sa Mandaue Martes sa buntag, Enero 15, aron mabawi ang 3.5 ektaryang luna sa Barangay Looc.
Mismo sila si Mayor Luigi Quisumbing ug Bise Mayor Carlo Fortuna uban ang mga taga City Legal Department ang nangunay sa pagduso ngadto sa Mandaue City Hall of Justice.
Gihulagway ni Quisumbing nga pinakadakung kurapsyon nga nahimo sa kagamhanan sa Dakbayan sa Mandaue ang maong pagbaligya sa 3.5 ektaryang luna nga nahimutang sa Barangay Looc ngadto sa kompanya nga EC Ouano Development and Management Corporation (Ecodemcor), hinungdan nga dili lang mga abogado sa Mandaue City Government ang niduso sa kaso, kundi gipangunayan kini ni Quisumbing ug sa iyang Bise Mayor Carlo Fortuna.
Matud ni Quisumbing nga pagpakita lang kini sa ilang kaseryuso sa paggukod sa nalambigit sa kurapsyon sa syudad.
Dugang ni Quisumbing nga grabeng na-alkansi ang syudad sa pagbaligya sa luna sa kantidad nga tag-50 pesos lang matag metro kwadrado niadtong tuig 2015 sa panahon sa pangagamhanan ni kanhi mayor ug karon Congressman Jonas Cortes.
Sa pagpasaka sa kasong annulment of deed of sale, katuyuan nila ang mabawi ang luna aron magamit diha sa 1 bilyones pesos nga proyektong pabalay ni Pangulo Rodrigo Duterte nga gihatag sa dakbayan sa Mandaue.
Daan na nga nipahibaw ang mayor nga nagkulang gyud og luna ang kagamhanan sa syudad sa Mandaue.
“We consider this as possibly the biggest and the most corrupt deal in Mandaue City. It is important to us to be able to set this transaction right, so that we would be able to recover the property for the benefit of the future generations of Mandauehanon,” pasabot ni Quisumbing.
Dugang sa mayor nga lain pa unya, 5 ngadto sa 6 ka mga kaso ang ipasaka may labot sa kurapsyon ug sa mga tawo nga nagpaluyo niini. Sa dihang gipangutana ang mayor kon unsa ug si kinsa, nagdumili lang una kini sa pagbutyag.
Si Fortuna, sa iyang bahin, nitug-an nga adunay mga kalapasan sad nga nahimo diha sa konseho atol sa paghatag og pagtugot sa kanhi mayor sa pagbaligya sa luna nga angay lang korehean. Dugang niya nga bisan kon si kinsa pa ang mayor karon, ang maong lakang suportado niya.
“When we pass the resolution authorizing the mayor (Quisumbing) to institute the necessary actions to recover the property part of that is the filing of annulment, this is to ensure the proper procedure will always be complied with kay first and foremost naa tay governing laws ana. Klaro man gyud na no, nga disposal of (government) property shall be done through public bidding, kon mo-fail ang public bidding diha na nana ang negituated sale, so none of this requirements were able to complied with.,” saysay ni Fortuna.
Daan na nga nipadayag og kaandam ang kampo ni Cortes sa pagpasaka og kaso sa habig ni Quisumbing may labot sa maong isyu.
Gani matud ni Atty. Jamaal Calipayan, ang chief-of-staff ni Cortes, sa niaging interview sa mga tigbalita nga mas maayo nga mapadangat kini sa korte aron sa tukmang lugar nila mapasabot ang ilang habig.
Gihulagway sa kampo ni Cortes nga klarong pamolitika ang gibuhat sa kampo nga ni Quisumbing, ilabi na nga karon pa lang kini nibuto nga isyu nga nagsingabot ang Mayo 2019 nga piniliay, diin ang kanhi manag-alyansa nga si Quisumbing ug Cortes ang karon mag-kontra alang sa posisyon sa pagka-mayor.
Laing gikwestyon sa kampo ni Cortes ang pagpagawas nila Quisumbing may labot sa gi-donate nga luna sa Ecodemcor ngadto sa kagamhanan aron mamahimo nga dan.
Tubag usab ni Quisumbing, "If the deed of donation ang ilang ipagawas, alkanse gihapon ang Mandaue ana, even if let’s say valid ang donation, though walay labot ang donation, gani if they insist that it is a land swap, naa pay posibilidad nga apilon pag-charges of tax evasion kay ang ilang gipagawas, naa silay gi-donate, gibaligya ang luna nga ingon ana kabarato, that is to avoid tax liabilities, so mapun-an pa nuon ang mga criminal charges kon ila gyud na i-insist."
Gidawat ang kaso sa clerk of court pinaagi ni Atty. Carmen Carmela Antiporta. (Fe Marie Dumaboc)