NGANO kaha nga sama sa walay pagka-hurot ang supply sa shabu sa lalawigan sa Bohol?
Mabasa nato sa mga pahayagan nga halos kada-adlaw na ang dakop nga gihimo sa kapolisan ug sa PDEA batok sa mga tigpayuhot sa ginadiling druga.
Ang nakaparat ra ba kay dinagko na ang kantidad nga nadakpan sa kapolisan.
Mokabat na sa minilyon ka pesos ang kasagarang kantidad sa madakpan.
Dis-a man kini sila magkuha sa ilang supply?
Angay unta kita malipay kay nagkugi ang kapolisan sa ilang trabaho batok sa ginadiling druga. Angay unta kita malipay nga kon gustohon gyod sa kagamhanan, duna pa diay mahimo nga pangontra sa pagkatap sa druga.
Apan kon imong hunahunaon pag-ayo, angay diay kita nga maguol kay makita nato nga sama sa way paghubas o dili mahurot ang supply sa ginadiling druga bisan pa sa paningkamot sa kapolisan.
May rason gyod diay nga ma-alarma ang katawhan tungod kay sama sa nagakadaghan man hinuon ang supply.
Laing rason nga ma-alarma kita kay kon daghan ang supply, nagpasabot nga daghan sab diay ang tig-gamitan sa maong druga.
Og nagpasabot pa gyod nga sayon ra diay kaayo nila ang pagpayuhot sa maong mga druga sulod sa lalawigan sa Bohol.
Kon naghitak na ang druga sa usa ka lugar, unya nagpasalig ang mga local nga pangagamhanan nga ilang lig-onon ang ilang kampanya batok sa ginadiling druga, unsay masulod sa atong hunahuna mahitungod niini?
Malamposon ba sila o palpak ang ilang gisaad?
Matod pa sa usa ka tinubdan, nindot kuno kaayo ang negosyo sa druga.
Matod niya, ang imong 2M ka pesos mahimong 8M sulod sa usa ka bulan nga pag-negosyo.
Susmariosep.
Ingon ana kakusog ang negosyo sa druga?
Kon mao kana, dili diay kita angay matingala kon dunay mga negosyante nga mosulod na lang sa maong negosyo kay dali ra man diay kaayo modako ang puhunan?
Midugang pa siya nga walay laing negosyo ang makatumbas sa negosyo sa druga.
Sa mga nasuheto na sa lokal nga pangagamhanan, duna sab silay ikasulti bahin sa naghitak nga druga.
Matod pa nila, walay mahitabo sa usa ka barangay nga dili mahibaw-an sa Kapitan, walay mahitabo sa lungsod nga dili mahibaw-an sa Mayor og walay mahitabo sa probinsiya nga dili mahibaw-an sa gobernador.
Aguyyyy.
Subay niini, misulti siya nga lisod katuhoan nga ang namunoan wala masayod kon kinsa ang tigpayuhot sa druga sa iyang lugar.
Tinuod ba kini?
Gitinuod gyod ni Majority Floor Leader Rolando Andaya ang iyang bahad nga mopasaka siya og kaso kon dili ihatag ang usbaw nga suholan sa mga kawani sa gobierno.
Mi-file si Andaya kaniadtong Lunes sa usa ka kaso nga Mandamus didto sa Supreme Court aron pugson ang kagamhanan pinaagi sa DBM nga i-implementar ang usbaw sa suholan.
Sa pagka-karon, dili pa nato mahibaw-an kon modaog ba o mapildi si Andaya sa maong kaso.
Apan ang segurado sa iyang gibuhat mao kini – daghan ang malipay o mag-ampo nga modaog si Andaya sa maong kaso.
Ngano man?
Tiaw bay usbawan ang sweldo sa tanang mga empleyado sa gobierno, pila ka milyon kaha ka mga tawo ang malipay niini.
Gani, mogawas pa nga sama sa usa ka hero si Andaya tungod kay gibarogan niya ang interes sa mga empleyado nga makakuha og dako-dako nga suholan. Segurado nga mo-ani gyod og pogi points si Andaya niini, ingon man si Speaker Gloria Macapagal-Arroyo.
Husto kaayo sa timing ang maong buhat ni Andaya taliwala sa padayong pagsaka sa presyo sa mga palaliton.
Good shot ni Andaya, bad shot ni Diokno.