IPATUMAN sa City Local Environment and Natural Resources (Clenro) karong umaabot nga Hulyo 1 ang paghatag og multa ug dili paghakot sa mga basura nga wala gilain-lain gikan sa mga malata ug dili malata.
Matud ni Engineer Armen Cuenca, ulo sa Clenro, nga dili gyud hakuton ang mga basura nga wala na-segregate.
“Karon from January to July mao na among campaign from Barangay 1 to 40 after ana by July 1 kato na dayon ato na gyud e-implement kung pagtan-aw nato nga iyang basura wala na segregate atong labyan ug ato siyang isyuhan og usa ka violation,” matud ni Cuenca.
Gidugang pa niini nga mokabat sa P500 hangtod na sa P2 mil ang multa sa matag panimalay nga wala nagtuman niini nga ordinansa sa dakbayan.
Samtang usa sa mga residente ang nagreklamo pinaagi sa post sa Facebook human nga pabayron sila og P30 sa mga residential samtang P50 sa mga establistamento nga nagnegosyo.
Gibutyag ni Cuenca nga dunay katungod ang barangay ilabi na nga aprobado kini sa City Council ug manghinaot nga magtinabangay na lamang tungod na usab kay sa kaayohan man kini sa tanan.
“Di ta makapanghilabot, sayunan ka ana P30 unya mahinlo ang imong paligid, okay ra kaayo tinabangay lang ta kay para man ni sa atong community,” matud ni Cuenca.
Gidugang pa niini nga kung dunay mga reklamo sa mga balaod sa barangay pwedi kini e-reklamo sa barangay assembly aron usab mapaabot ug mapangutana kung asa makapaingon ang P30 ug kung uyon ba ang tanan niini.
“Kung mao na ang nakita sa inyong barangay sunod mo kung dili mo gusto naa may barangay assembly ug didto ninyo ibutyag, kung asa paingon ang P30 dayon nakolekta ba gyud sa barangay ang iyang dapat kolektahon aron ang barangay maghunahuna kung ang iyang gibuhat maayo ba ang iyang kabarangay,” dugang ni Cuenca.
Samtang nibutyag ang usa sa mga residente nga medyo bug-at ra ang P30 apan kung duna gyud ipatuman nanghinaot nga paubsan kini sa P10 ngadto P15. (KCS)