GITUOHANG depensa na lang sa PaDayon Pilipino ang pag-ingon nga dili patas ang nahitabong “unity walk,” “integrity pledge,” ug “peace covenant signing” niadtong Dominggo, Enero 13, hinungdan nga wala mitunga ang maong partido sa kalihokan.
Sa pamahayag ni Jose Gabriel “Pompee” La Viña nga susama nga dili gihapon patas ang gipahigayong kalihokan tungod si Mayor Oscar Moreno lang ang gihatagan og higayon nga mu-estorya.
Sa pakighinabi kang Teodoro “Teddy” Sabuga-a, Jr., City Administrator sa dakbayan sa Cagayan de Oro, gibutyag niini nga depensa na lamang kini sa maong partido kay wala man sila mitunga.
“Ila naman nang depensa, standard procedure man na kung kinsa ang incumbent, kinsa man diay imong ipa-welcome natural man na wala man sab si mayor nag insist nga siya’y mu-welcome kato siya, nag organize man to wala man to’y malisya,” matud ni Sabuga-a.
Gidugang pa niini nga nagpakita pa gani og pagkamaligdong si Moreno tungod wala kini nag-uniporme atol sa kalihokan, ug nangayo og pasensiya sa mga kauban sa partido kay maghatag man kini og mensahe isip pag-welcome sa maong kalihokan.
“In fact, gani si Mayor Moreno nangayo siya’g apology sa grupo nga dili siya mag green kay nagputi siya kay naghatag man siya og speech lugar kana nga decency ba ingon ana si Oca pero kung sila pa kaniadto magpa uniporme kadto, mag violet-violet kadto,” dugang niini.
Kahinumduman nga atol sa unity walk sa dakbayan sa Cagayan de Oro, wala nitunga ang kampo sa PaDayon Pilipino gawas lamang ni Congressman Rufus Rodriguez, samtang halos kumpleto ang presensya sa mga magpapili sa kampo ni Moreno.
Giingong si Gobernador Yevgeny Vincente “Bambi” Emano wala naghatag sa iyang mensahe bisan nga anaa kini sa programa tungod buot kini og patas.
“It’s unfair, I was given a part of the program nga mag welcome sa mga kandidato but I declined kay basin isipon sa uban o sa akong kaatbang nga tungod kay incumbent ko makalamang ko sa akong kaatbang,”matud ni Emano.
Samtang nibutyag usab ang kapulisan nga padayon ang ilang hanay nga non-partisan ug wala kini sila’y gidapigan nga bisan unsa nga partido o pulitiko ilabi na niining nagsing-abot nga eleksiyon. (KCS)