PAGLABAY sa siyam ka mga tuig, nahibalik sa national team ang pambatong pointguard sa Magnolia Ang Pambansang Manok Hotshots nga si Mark Barroca.
Si Barroca, kinsa napiling Finals MVP dihang naghari ang Hotshots sa miaging Philippine Basketball Association (PBA) Governor’s Cup, usa sa bag-ong mga gipangkuha ni national coach Yeng Guiao alang sa kampanya sa Team Pilipinas sa 6th window sa FIBA World Cup Asian qualifiers.
Ang laing bag-ong pangalan nga gipili ni Guiao alang sa 14-man pool mao sila si Roger Pogoy sa Talk N’ Text KaTropa ug Raymond Almazan sa Rain or Shine Elasto Painters.
Ang ubang sakop sa national team mao sila si Jayson Castro, Paul Lee, Scottie Thompson, Marcio Lassiter, Gabe Norwood, Troy Rosario, Japeth Aguilar, Poy Erram, June Mar Fajardo, ug naturalized player Andray Blatche.
Gilista sab ni Guiao ang Fil-German forward sa San Miguel Beermen nga si Christian Standhardinger isip back-up naturalized player.
Si Barroca sakop sa orihinal nga Gilas Pilipinas niadtong 2010 nga ubos sa paggiya ni Rajko Toroman.
Ikabuan og balik ni Barroca si Lassiter, kinsa sakop sab sa orihinal nga Gilas Pilpinas nga gisugdan og porma ni sports patron Manny V. Pangilinan niadtong 2009.
Ang Team Pilipinas magsugod sa ilang hugot nga pagpangandam karong Enero 21.
Sa katapusang duha ka mga tahas sa Team Pilipinas sa Asian qualifiers, ilang asdangon ang Qatar karong Pebrero 21 dayon ang Kazakhstan karong Pebrero 24.
Sa kasamtangan, ang Team Pilipinas nakapuwesto sa ikaupat sa Group F nga adunay 5-5 nga rekord sunod sa Australia (9-1), Iran (8-2), ug Japan (6-4).
Ang mopatigbabaw nga tulo sa Group F ug Group E lakip na ang 4th placer nga adunay mas taas nga rekord ang maka-qualify sa umaabot nga FIBA World Cup. ESL