MATALAM, North Cotabato -- Tulo ka tawo ang patay samtang siyam pa ang naangol sa karambola sa tulo ka sakyanan ala 1:45 sa hapon niadtong Lunes, Enero 14.
Giila ang mga namatay nga sila si Edelbert Gawat, 40, drayber sa traysikol, Veronica Gawat, 66, nga pulos nagpuyo sa Barangay Bannawag, Kabacan, ug usa ka Yhasser, 15, taga Pigcawayan.
Samtang naangol sila si Charlene Gawat, 38, taga Barangay Bannawag; Hasim Kinala, 24; Haron Kinala, 19; ug Esmail Mohammed, 21 nga sakay sa KIA Bongo, taga Pigcawayan.
Naangol sab ang mga sakay sa Toyota Hilux pick-up nga sila Ridznul Tandih, 34, drayber; mga kauban nga sila Randy Misil, 36; Bakil Jundan, 45; Salip Allahibar, 25; ug Salip Hieber, 33, mga molupyo sa Zamboanga City.
Gibutyag ni Superintendent Bernard Tayong, tigpamaba sa North Cotabato Police Provincial Office nga paspas ang dagan sa Hilux pick-up gikan sa Zamboanga City paingon sa dakbayan sa Davao.
Pag-abot sa Purok 3, Barangay Kilada, Matalam, gidaro niini ang kasugat nga traysikol ug Kia Bongo fish car.
Midiretso pa ang pick-up daplin sa national highway ug gibanggaan ang Daycare Center ug usa ka balay.
Patay on the spot ang drayber sa traysikol nga si Edelbert samtang sila Veronica ug Yhasser, dead on arrival sa tambalanan.
Daghan ang nagtuo nga posibleng nakatulog ang drayber sa pick-up gumikan sa kalayo sa biyahe niini nga miresulta sa disgrasya.