NAKATAKDANG mag-atubang og kasong kalapasan sa Omnibus Election Code, ug Illegal Possession of Firearms apil na ang kalapasan sa paghupot og iligal nga druga ang siyam ka mga tawo nga nadakpan atol sa gipahigayon nga drug bust sa Maharlika Highway, Km. 25, Bunawan District, Davao City, Lunes sa gabii, Enero 14.
Sumala ni Chief Inspector Milgrace Cajes Driz, hepe sa CIDG-DCFU, ang siyam mga sakop sa Escudero Criminal Gang nalambigit sa gunrunning syndicate ug pagpayuhot og gidiling druga.
Atol sa drug bust sa mga sakop sa Criminal Investigation and Detection Group (CIDG)-Davao Region, Davao City Field Unit (DCFU) ug sa Philippine Drug Enforcement Agency (PDEA)-Davao Region, nakuha gikan sa grupo ang usa ka dako nga pakete, duha ka medium size ug usa ka gamay nga pakete sa gituohang shabu nga tanan dunay gibug-aton nga 55 gramos ug nagkantidad kini sa P660,000.
Narekober usab ang usa ka caliber .40 nga pistola nga dunay usa ka magazine nga nagsulod og walo ka mga bala ug usa ka 9mm nga pistola nga dunay 14 ka mga buhing bala.
Lakip sab sa nakuha ang usa ka kalibre 45 nga pistola nga dunay lima ka mga buhing bala, usa ka kalibre .38 nga revolver nga dunay tulo ka mga buhing bala, usa ka multi-suppressor, duha ka mga sakyanan ug drug bust money.
Si Driz nagbutyag nga gikan ang mga suspek sa Island Garden City of Samal (Igacos) diin ila na kining namonitor.
Sa dihang paduol na ang sakyanan sa checkpoint, gilayon milusad og drug bust ang otoridad hinungdan nga maayong pagkasikop sa mga suspek.
Gipugngan una ang mga pangalan sa mga nahisgutan sanglit wala pa pormal nga napasaka ang kaso didto sa korte.