GITAMBUNGAN ni Senador Antonio Trillanes IV ang pagbasa og sumbong kaniya sa upat ka kasong libel nga gipasaka ni Presidential son Paolo Duterte ug abogado Mans Carpio sa Branch 54 sa Regional Trial Court (RTC) sa Hall of Justice sa dakbayan sa Davao, Martes sa buntag, Enero 15.
Buntag pang sayo, sa pagnaug sa abyon gikan sa kaulohan midiretso dayon si Trillanes sa usa ka hotel ug pagka-alas 8:30 mideretso kini sa Hall of Justice sa Ecoland.
Human sa iyang pagtambong sa korte, gi-atubang sa senador ang mga media nga nag-atang kaniya.
Atol sa pakighinabi kaniya, subli niining gipaklaro nga alang kaniya ang mga kaso nga gipasaka kaniya ang usa lamang kuno ka matang sa harassment.
“Mga harassment cases to, para ma-distract ako, pero I will continue my mandate as an opposition,” suma ni Trillanes.
Sumala niini nga ang iyang pag-adto sa Davao City, pagpakita lamang kuno kini nga iyang girespeto ang korte sa siyudad.
Sa dihang gipangutana sa media kung naa ba kini mensahe ngadto kang Paulo ug Carpio, gitubag kini ni Trillanes sa pag-ingon nga lingin kuno ang kalibutan.
“Umiikot ang mundo sinasalo ko lang ang lahat ng mga paghamon na binibigay nila sa akin, pero darating din ang panahon na sila rin ang tatanggap ng hamon,” saysay pa ni Trillanes.
Human sa pakighinabi sa media mibiya dayon si Trillanes, nga gwardiyado sa iyang mga kauban.
Samtang anaa si Trillanes sa sulod sa korte, gwardiyado sa kapulisan ang palibot sa korte gani duna pay pwersa sa Special Weapons and Tactics sa Davao City Police Office ang gibutang sa lugar.