WA na mahimuot si Lapu-Lapu City Mayor Paz Radaza niining padayon gihapong pagdagsa sa mga hospital waste sa kadagatan sa dakbayan sukad pa sa miaging semana.
Kagahapong adlawa (Enero 15) gipasusi na usab sa mayor ang taho nga aduna na usay laing hospital waste nga nadagsa sa Brgy Canjulao ug Punta Engaño.
Sa kinatibuk-an moabot na sa pito ka mga barangay sa dakbayan ang nadagsaan sa mga hospital waste nga mao ang Brgy Ibo, Pusok, Mactan, Poblacion, Pajo, Buaya ug Canjulao. Kini pulos nag-atubang sa Mactan channel.
Gibutyag sa mayor nga dili na maayo ang padayong pagdagsa sa mga hospital waste sa dakbayan ug angayan gayud nga manubag ang mga hingtungdang tambalanan kalabot niini. GCM