BISAN kon labing daku ug ginaatangan nga festival sa nasod, ang contingents sa Sinulog grand parade nasinati sa pagminos ug pagsaka sa mga nangapil sa nakalabay nga 12 ka mga tuig.
Sa 2007, ang Sinulog Foundation Inc. ningtala og 50 ka dancing contingents.
Sa 2008 ug 2009, mokabat lang sa 44 ang mga partisipante sa grand parade.
Sa mosunod nga duha ka mga tuig, SFI nakasinati sa pagsaka sa contingents ug dunay 49 ka partisipante sa ritual showdown.
Sa 2013 dihang ang organizers nakasinati og pipila ka partisipante, diin 40 na lang ang nangapil.
Niminos pa kini sa 2014, diin 36 na lang kini. Kini nisaka sa hinuon sa 44 sa 2015.
Sa 2017 miminos ngadto sa 23 ug sa miaging tuig, nisaka hinuon ngadto sa 30.
Karong tuiga, 24 na lang ang nagparehistro sa dancing contingents.
Laing contingents
Moapil sab sa parade ang 24 ka mga higante, 10 puppeteers ug 42 ka buok floats.
Sugdan ang parade sa misa sa alas 8 sa buntag.
Gilaumang mahuman ang tibuok programa pasado alas 6 sa gabie.
Si Konsehal Dave Tumulak, executive committee chairperson sa Sinulog 2019, nanghinaot nga way mga babag nga makapalangan sa grand parade.
Nitataw sab si Tumulak nga usa ang mga photographers sa makalangay sa paglusot sa dancing contingents tungod kay makababag kini sa mga agianan.
Ila kining naobserbahan atol Sinulog sa Kabataan sa Lalawigan, ug Sinulog sa Barangay sa Dakbayan niadtong Sabado ug Dominggo.
“Mo hangyo lang ta sa mga photographers nga naa pa man tay time , pila ka days to look for a site or venue asa sila mag station para makakuha sila og mga photos not to obstruct the dancers para makakuha gyud ta sa atong time sa paghuman,” sigon ni Tumulak.
Dugang niya nga di sab nila tugutan ang mga photographers nga wa’y opisyal nga identifcation (ID) nga makasulod sa Sinulog routes.
"Ang PNP mismo sa ilahang support nga gihatag diri nato, diha sa Sinulog routes, kon adunay photographers nga way official ID, papahawaon gyud sila sa site ug kato sang mga photographers nga mobabag gyud kay nakita man gud sa Sabado ug Dominggo nga na langay-langay to gamay tungod sa mga photographers nga mo babag." pagpasabot ni Tumulak.
Hayan uwanon
Samtang sa laing bahin, gi-awhag sab ni Tumulak ang dancing contingents ug mga mosalmot sa grande parade sa pagpangandam tungod nagsingabot nga low pressure area.
"Ato sab gihangyo atoang mga contingents labi na katong mo tan-aw sa Sinulog nga duna ta'y nagdanga-danga nga low pressure, based on the models available aduna'y 40 % chance nga ma develop into tropical depression." matod niya.
Matod niya duna'y posibilidad nga mag uwan-wan karong umaabot sa Biyernes, Sabado ug Dominggo, busa iyang gipahimangoan ang mga contingents nga maghimo og mga contingency measures labi na sa ilang street dancing.
Nibutyag sab si Tumulak nga kon uwan-uwan lang ang masinati sa siyudad, mahimong magpa dayon ang granda parade, apan wala pa sila'y nasabotan nga desisyon kon aduna man gani bagyo nga mahitabo. (Kiziah Marie Suello, RVC & RTF sa SunStar Cebu)