TULO ka dagkong mga kalihukan sa Sinulog ang gikatakda nga pagngan og signal aron pagsiguro sa seguridad niini.
Ang National Telecommunications Commission (NTC) 7 nipahibawo na nga aprobado na ang hangyo sa kapulisan nga i-shutoff ang pipila ka lugar sa pipila ka mga dapit nga maagian o mahitabo ang mga kalihukan.
Sa unang higayon, way signal ang rota sa seaborne procession sa Sabado, Enero 19, sugod alas 3 sa kaadlawon hangtod alas 10 sa buntag.
Ang mga dapit nga apektado mao ang mga dakbayan sa Sugbo, Mandaue ug Lapu-Lapu.
Samtang atol sa solemn procession sa hapon, i-shutoff usab ang signal pagbalik sa alas 12 sa udto hangtod alas 8 sa gabii.
Lakip sa dapit nga way signal ang uptown ug downtown sa dakbayan sa Sugbo.
Atol usab sa Sinulog grand parade sa Dominggo, Enero 20, wa na’y signal sa uptown ug downtown sa syudad sa Sugbo sugod alas 3 sa kaadlawon hangtod alas 7 sa gabii.
Matod ni Engr. Bill Peralta, Emergency Telecommunicator sa NTC 7, nga di shutdown ang mahitabo tungod kay ang shutdown mao ang pagpawng gyud sa cell sites.
Nipasabot kini nga shutoff lang ang himuon sa tulo ka dagkong telcos diin ilang pahinayan ang signal nga nag-atubang sa mga dapit nga mahitaboan sa dagkong aktibidad.
Hinuon niangkon siya nga aduna gyu’y pipila ka mga dapit sama sa Bohol nga maapektohan ang signal niini.
Ang memorandum ni NTC Commissioner Gamaliel Cordoba kabahin sa pag-aprobar sa signal shutoff niadto pang Enero 11 giparobahan.
Samtang gipadala na kini sa dagkong telcos, lakip niini ang Smart Communications, Inc., Globe Telecomm, Inc. ug Digitel Mobile Philippines, Inc.
Iro mobantay
Samtang 16 ka K9 units ang naabot sa Police Regional office 7 alang sa hugot nga siguridad sa Basilica ug sa mga dapit nga adunay daghang tawo atol sa Sinulog grand parade karong Dominggo, Enero 20.
Matod ni Col. Noel Baluyan, commander sa Task Force Cebu, nga ang maong mga K9 unit gibansay kini pag detect sa bomba bisan asa pa gitago.
Kon nagkinahanglan pa ang PRO 7 og laing iro aduna pay nakaestambay nga upat ka K9 sa Central Command (Centcom) nga andam ipagamit kon gikinahanglan.
Upat niini gikan sa Philippine Army nga nakabase sa Tarlac samtang ang laing tulo gikan sa Philippine Coast Guard (PCG) ug PRO-7
Matod ni Sr. Supt. Angelito Dumangeng, deputy regional director for operations sa PRO 7, nga ang maong mga iro ipakatap sa mga dapit nga adunay daghang mga tawo sama sa Basilica ug sa Cebu City Sports Center. HBL & AYB