UTINGKAYON ug susihon sa technical working group (TWG) sa Department of Transportation ( DOTr) kon angay ba nga tugotan nga makapamasahero nga legal ang habalhabal o motorcycle taxi.
Si Assistant Secretary Mark Richmund De Leon sa DOTr nagkanayon nga tukion sa TWG ang tulo ka mga aspeto sama legality, ang desisyon sa Supreme Court batok sa Angkas ug ila sab hisgotan kon unsaon pag-regulate ang habalhabal.
Ang TWG langkuban sa DOTr, Land Transportation Office, Land Transportation Franchising and Regulatory Board, government agency labot sa transportation ug traffic ug non-government organization.
Sila si Kongresista Raul del Mar sa Cebu City north district ug Rodrigo Abellanosa sa Cebu City south district kinsa maoy nag-uban ni Mayor Tomas Osmeña sa hearing nga gidumala ni Kongresista Winston Castelo,chairman sa Metro Manila Development, niingon nga wa nay igong panahon ang Kongreso pagpasar og balaod pag-legalize sa habalhabal sanglit tulo nalang sila ka session ug mo-adjourn na kay magsugod na ang kampanya.
Si De Leon, sa iyang bahin, nagkanayon nga ilang tan-awon ang legalidad sanglit ubos sa Republic 4136, kun Land Transportation and Traffic Code, ang pribadong motorsiklo o scooter wa maapil sa lista sa mode of transport.
Ikaduha nilang hatagan og gibug-aton mao ang desisyon sa Korte Suprema kansang niisyo og temporary restraining order batok sa Mandaluyong RTC Branch 213, nga maoy nidili sa awtoridad pagdakop sa Angkas riders. PAC