ANG 3.6 kilos nga gituohang shabu nga mobalor og P25 million gituohan nga ipamaligya taliwa sa kasaulogan sa Sinulog festival.
Nasinati na sa nanglabay nga katuigan nga di mominos usa ka milyon ka mga tawo ang mangsalmot sa labing dakong festival sa nasod.
Busa, matod ni Cebu City Police Director Royina Garma nga ang mao nga supply alang sa kalihukan.
Taliwa niini, niawhag usab siya sa mga ginikanan nga bantayan ang ilang mga anak kay segurado usab nga mokatap ang party drugs.
Gibahin
Matod ni Garma nga ilang nabantayan nga ang illegal nga drugas nga nasakmit niadtong Lunes sa gabii gipang bahin na kinig tulo ka putos.
Kini pulos motimbang og tag usa ka kilo ug unom ka tag 100 grams nga posibling padung na i-deliver sa mga drug player sa syudad sa Sugbo ni Alfred Gabunia.
Napanglantawan ni Garma nga mosaka pa ang supply sa illegal nga drugas sa syudad tungod sa daghang kalihukan sa Sinulog.
Iyang gimandoan ang Drug Enforcement Unit sa CCPO nga pahugtan ang ilang monitoring sa illegal nga drugas.
“Expected namin na dadami ang supply dahil sa Sinulog. That is why yung DEU natin will not be deployed for security sa Sinulog activities. Tuloy yung operation nila,” matod ni Garma.
Duha ka semana nga gipanid-an sa iyang mga sakop si Gabunia una nila napahigayon ang buy bust sa Macopa street, Barangay Basak San Nicolas, pasado alas 6 sa miaging gabii, Enero 14.
Gikan sa probinsya sa Lanao sa Mindanao ang supply sa drugas nga nakuha sa kapulisan nga gisakay matod pa sa ro-ro nga barko.
Gituohang gikanaug kini sa barko nga nidunggo sa usa sa mga pantalan sa habagatang Sugbo.Gibiyahe kini ngadto sa Talisay City.
Camotes group?
Sa gihimong imbestigasyon, si Gabunia nitumaw nga sakop sa Jay Camotes drug group.
Si Camotes, kinsa taga Dakbayan sa Carcar, naa sa sulod sa Cebu City Jail. Giingong nagpadayon gihapon siya sa illegal nga negosyo.
Gihulagway siyang dakong drug player sa mao nga dakbayan. Wa nganli ni Garma kinsa nga personalidad ang kontak niini sa Lanao sanglit adunay himuon nga follow up operation.
Nagtuo si Garma nga ang nasikop sa Provincial Intelligence Branch niadtong sa Disyembre adunay koneksyon kang Gabunia.
Gipangsubay na sa Intelligence Branch sa CCPO ang mga links ni Gabunia kon mosangko ba sa grupo ni Franz Sabalones.
Party drugs
Matod ni Garma nga aduna silay mga impormasyon nga nadawat sa pagkatap sa party drugs.
Usa sa ilahang namonitor kining strip-like nga party drugs.
Dugang niya nga niadtong Disyembre nakadakop sila niini apan tungod kay tago, lisod ang pag-surveillance ug pagdakop.
Tambag niya sa publiko, hilabi na sa mo-party karong Sinulog, nga likayan kining party drugs.
Samtang gipahibawo usab ni Garma nga estrikto sila sa Dominggo, atol sa Sinulog Grand Parade.
Matod ni Garma nga way warning nga mahitabo sa molapas sa balaod susama niining liquor ban.
Kon masakpan sa kapulisan nga nilapas niini dakpon dayon ug di na hatagan pa og warning.